طالبانو د کندوز او سرپل ولایتونه هم په بشپړه توګه ونیول

نن ټکی اسیا (یکشنبه، ۱۷ زمري، ۱۴۰۰ل): له څو ورځو سختو نښتو وروسته طالبانو نن سهار د کندوز او سرپل ولایتونو مرکزونه له دولتي عسکرو څخه نیولي او دا مهال د ښار په اطرافو کې د دولتي عسکرو او طالبانو ترمنځ خال خال نښتې روانې دي.

د طالبانو ویاند ذبیح الله مجاهد رسنیو ته په استولي پیغام کې ویلي، چې د «دښمن» په مرکزونو د څو پرلپسې او «کارنده» بریدونو پایله کې یې د کندوز ولایت مقام، امنیه قومنداني، د ملي امنیت ریاست، د محبس ودانۍ، بالاحصار او ټول دولتي تأسیسات نیولي دي.

نوموړي دغه راز د سرپل ولایت مرکز اړوند ولایت مقام، امنیه قومنداني، محبس او ټولو دولتي تأسیساتو د نیولو ترڅنګ په دواړو ولایتونو کې د ګڼ شمېر وسلو او زیاتې اندازې مهماتو د نیولو خبر هم ورکړی دی.

مجاهد په کندوز او سرپل ولایتونو کې په پاتې دولتي عسکرو پسې د «تعقیبي» عملیاتو د دوام ترڅنګ خبرداری ورکړی، که چیرې یاد عسکر له جګړې لاس وانخلي نو له «منځه به یووړل شي».

طالب ویاند دغه راز په ټول افغانستان کې د کابل حکومت عسکرو باندې غږ کړی چې د دوی غیږه ورته خلاصه ده او باید چې له «بې ځایه» جګړې څخه په لاس اخیستلو طالبانو سره یوځای شي.

د امریکايي ځواکونو لخوا د هوايي بریدونو په تړاو مجاهد ویلي، چې دغه بمبارونه په دوی هیڅ اثر نه کوي؛ ځکه دده په خبره دا شل کلونه یې ورسره تجربه شوې او ځانونه ورڅخه ساتلای شي.

دا په تیرو شلو کلونو کې لومړی ځل دی چې طالبان په یوه ورځ کې دوه ولایتونه نیسي.

دا په داسې حال کې ده چې طالبانو پرون د جوزجان ولایت مرکز شبرغان او وړمه ورځ د نیمروز ولایت مرکز زرنج ښارونه په بشپړه توګه ونیول.

باید وویل شي چې دامهال د کندهار، هلمند، تخار او بدخشان په ګډون د ‍۱۰ ولایتونو مرکزونه د طالبانو لخوا کلابند دي او هلته سختې نښتې روانې دي.