طالب قیادت ته سر پرانستی پیغام

لیکنه: دکتور عمر عماد

الحمد لله الذي قال في وصف المسلمين : (الَّذِينَ إِنْ مَكَّنَّاهُمْ فِي الْأَرْضِ أَقَامُوا الصَّلَاةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنْكَرِ وَلِلَّهِ عَاقِبَةُ الْأُمُورِ) ، والصلاة والسلام على المبعوث رحمة للعالمين ، وعلى من اهتدى بهداه واقتفى خطاه إلى يوم الدين ، أما بعد :

(إِنْ أُرِيدُ إِلَّا الْإِصْلَاحَ مَا اسْتَطَعْتُ وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ)

معلوميږي چې طالب یو ځل بیا د خورا ستر او تاریخي امتحان په درشل کې دی ، او په دې هیله چې دا پاتې ستونزه هم په داسې سوله ایزه توګه هواره شي چې د چا پوزه هم پکې وینې نه شي ، نو غواړم چې یو څو ټکو ته یې پام راواړوم :

1) – پام کوه طالبه : نړۍ نن سبا د یو کلي څه چې د یوې کوټې په څیر شوې ده ، هیڅ شی پکې پټ نه پاته کیږي، ستا هره وړه او غټه د افغانانو او نړیوالو له لورې په ذره بین څارل کیږي، او کیدای شي ډیره کوچنۍ اشتباه دې ډیره ستره انځور شي، نو باید تر ممکنه بریده په خپل عمل او وینا کې محتاط اوسې او چا ته د حقیقي نیوکې فرصت ورنه کړې، بلکې د انسانانو د څارنې او مراقبت نه مخکې باید رب العالمین پر ځان حاضر او ناظر او حسیب او رقیب وګڼې.

2) پام کوه طالبه چې : قدرت تر لاسه کول غنیمت نه بلکې امانت او مسئولیت وګڼې، قدرت او امارت ته د فرصت اوغنیمت په سترګه کتل په دنیا کې رسوایي او په اخرت کې سپکاوی او پښیمانی ده . أبو ذر رضي الله عنه وايي چې ما د رسول الله څخه وغوښتل چې کوم ځای مې امیر کړي، نو رسول الله صلی الله علیه پر اوږه ووهلم او راته یې وویل چې: أې اباذره ! ته ضعیف یې، او هغه ( امارت) امانت دی او هغه د قیامت په ورځ سپکاوی او پښیماني ده ، مګر د هغه چا لپاره چې په حق یې واخلي او د هغې مسئولیت پر ځای کړي .

3) پام کوه طالبه چې : د هغه بل وار په څیر د میم زر ما ټوله زما ناکامه تجربه بیا تکرار نه کړې، ځکه چې  کار اهل کار ته سپارل د اسلامي حکومتولۍ یو مهم اصل او خپل اهل ته د امانت سپارل دی(إِنَّ اللَّهَ يَأْمُرُكُمْ أَنْ تُؤَدُّوا الْأَماناتِ إِلى أَهْلِها ) د خالد بن ولید څخه نور ډیر متقي او پخواني صحابه موجود وو ، خو رسول الله صلی الله علیه وسلم هغه قوماندان وټاکه او د سیف الله لقب یې ورکړ بلکې زه لا د دې نه هم وړاندې ځم او وایم چې که طالب غواړي خپل تاریخ د خپل بیرغ په شان سپین وساتي نو باید حکومتي چارې نورو اهلو کسانو ته پریږدي او خپله د یو مراقب او څارونکي په حیث پاتې شي.

4) پام کوه طالبه چې: د ولس په وړاندې ځان غالب او فاتح او ولس مغلوب او مفتوح ونه ګڼې ، ځکه دغه استعلائي او کبریایي چلند او منطق د هلاکت او بربادۍ سبب دی، عظمت او کبریا یوازې د الله تعالی ځانګړتیا ده (الْعَظَمَةُ إِزَارِي وَالْكِبْرِيَاءُ رِدَائِي فَمَنْ نَازَعَنِي وَاحِدًا مِنْهُمَا أَلْقَيْتُهُ فِي جَهَنَّمَ)

5) پام کوه طالبه چې : کوم وطنوال ته بې موجبه ټنډه تروه نه کړې او څوک ونه رټې، د چا نه د بې ځایه غچ اخیستلو پر ځای د بخښنې اوچت اسلامي خلق خپل کړه ، نرمښت او ښه سلوک ، په رسول الله صلی الله علیه وسلم د الله تعالی پیرزوینه ، او عفوه او بخښنه یې ورته سپارښتنه وه: (فبِما رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ فَاعْفُ عَنْهُمْ).د بدۍ په مقابل کې نیکي او احسان کول د دښمن څخه مینه ناک دوست جوړوي (وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَداوَةٌ كَأَنَّهُ وَلِيٌّ حَمِيمٌ). که غواړئ چې د دنیا بری او د اخرت سعادت مو په برخه شي نو د خلکو په زړونو حکومت وکړئ . او د افغانستان په دې څلویښت کلن ناسور د مرهم پټۍ کښیږدئ .

6) پام کوه طالبه چې: ځان له سالم نقد او نیکې مشورې څخه پوره ونه ګڼې ، بلکه سالم نقد په ورین تندي ومنه ،  مشوره وکړه اوګټوره یې ومنه ، الله تعالی هغه چا ته په مشوره کولو امر کړی چې هره شیبه یې د اسمان سره اړیکه وه – صلوات ربی وسلامه علیه – (وَشاوِرْهُمْ فِي الْأَمْرِ) او مسلمانان یې په خپل منځي مشوره کولو ستایلي دي (وَأَمْرُهُمْ شُورى بَيْنَهُمْ) .

7) پام کوه طالبه چې: خپل ټول مسئولیت یوازې په امن راوستلو کې راغوټه نه کړي ، که نه په هدیره کې د بل هر ځای نه امن او کراري ډیره وي، بلکې د خلکو د ورځنیو اړتیاوو پوره کولو ته پر هر څه لومړیتوب ورکړه .

8- پام کوه طالبه چې : علم یوازې شرعي علم ونه ګڼې، بلکې په دې باید پوه شې چې د دنیوي علومو تر لاسه کول هم فرض کفایي دی ، نن سبا د علم زمانه ده او د الله تعالی د مرستی نه وروسته علمي پرمختګ د ټولنې د بقاء ضامن دی ، که غواړئ چې افغانستان د سیالانو سره سیال شي نو د دنیوي علومو پر مختګ ته یې پوره پاملرنه وکړئ .

9) پام کوه طالبه چې: تا د اسلام غږ پورته کړی دی ، نو خدای مه کړه ستا د رښتیني اسلام سره هر مخالف قول او دریځ او چلند به د اخروي رسوایي برسیره د اسلام او مسلمانانو پر ټنډه داسې تور داغ وي چې د هر چا کرکه به ترې کیږي ، او بیا به اسلامي دعوت د بې باورۍ د داسې څپې څخه کړیږي چې رغېدل به یې ډیر ستونزمن وي.

10) او په لنډو ټکو کې چې پورتني ټول پکې رانغاړل کیږي :

پام کوه طالبه چې: ستا په هکله منفي نظر لرونکي رښتیني او خوښ ، او ستا په هکله مثبت نظر لرونکي دروغجن او ناهیلي نه کړې.

( وما علينا إلا البلاغ )