د اسلامي امارت د مدیریت او منجمنټ چارې

د،ب،هيښ

ځينې خلک د افغانستان بانک ، برېښنا رياست او په  نورو اداري څوکيو او منصبونو د مولوي صاحبانو په تقرر اعتراض کوي او دليل دا وايي چې د افغانستان بانک ريس خو د اقتصاد متخصص او د بريښنا ريس د برق انجنير نه دی، نو دا خو کار اهل د کار ته ونه سپارل شو.
دا نيوکه ډېره غلطه، بې بنياده او غير مؤجه ده.

مديريت او منجمنټ هم د نورو فنونو، حرفو او مسلکونو په شان  يو تخصص او مسلک دی.
مديريت د يوې ادارې، اورګان، انستيتوت ، کارخانې او يا بلې توليدي – خدماتي مجموعې په مؤثره، معقوله او ګټوره توګه اداره کول، رهبري، تنظيم کول او  انسجام دی چې د طرح شوي پلان مطابق ټاکل شويو اهدافو ته خپله مجموعه ورسوي.

د مديريت لپاره مديريتي تخصص، تجربه، وړتيا او تر ټولو مهمه سياسي تقوا او صداقت مهم فکتورونه دي، نه د نورو حرفو حرفه يي زده کړه او تجربه.

هر مسلکي کدر ښايي په خپل مسلک کې ډېر وارد او پوه وي، مګر په مديريت او منجمنټ کې هېڅ تجربه او لياقت ونه لري، نو حتمي نه ده چې مديريتي پوستونه بايد هغه مسلکي خلکو ته ورکړل شي چې د مديريت او منجمنټ په برخه کې نه معلومات لري او نه تجربه. همدا شان هر منېجر او مدير په يوه بله حرفه او مهارت کې ښايي بې سواده وي، کافي معلومات او د يوه عادي فني کارګر لياقت او مهارت ونه لري، نو ضرور نه ده چې د هغوی په فني کارونو کې مداخله وکړي.

طالبان د مديريت او منجمنټ په برخه کې ماهرين او متخصص دي، ځکه همدغه يې تحصيلي او تحقيقي رشته او کاري ساحه  ده. دوی د مسلمانې ټولنې د ارشاد، د اقتصادي  معاملاتو، د شر -فساد د ريښو ايستلو، مادي او معنوي لارښودنو، ديني او کلتوري ارزښتونو د ساتلو او ټولنه د اخلاقي، سياسي، اقتصادي، ثقافتي فساد نه د ژغورلو او په سمه لاره سوق کولو په برخه کې تحصيل کړې ده او  د اسلام د دين اوامر، احکام، هدايات او مشورې يې  زده کړې دي  او د عملي کولو په فن او هنر يې ډېر ښه پوهيږي.

طالبانو په دا شل کاله مبارزه کې په نظامي، سياسي، ثقافتي او امنيتي برخو کې د خپل مديريت او منجمنټ وړتيا او ظرفيت وښود او په دومره تخصصي، زيرکانه او مدبرانه شکل يې دا مبارزه وچلوله چې د دنيا لوی ابرقدرت او څو څلوېښت ملګري اشغالګر يې په نظامي او سياسي ډګر کې په ګونډو کړل او په يوويشتمه پېړۍ کې يې د ملتونو د ازادۍ او استقلال غوښتنې نهال په خپلو وينو اوبه کړ، خو وچېدو ته يې پرې نه ښودلو او په يوه هېښوونکې او اعجاز امیزه توګه يې د اشغال سره د مقابلې او د ازادۍ -استقلال حاصلولو هدف مديريت کړ او کاميابۍ ته يې ورسولو.

ايا دومره لوی بری د يوه سالم، خارق العاده او عالي مديريت او منجمنټ ژوندی مثال نه دی؟
د طالبانو د اسلامي امارت په پخواني دور کې د وحشي اشرارو د وحشت نه وطن خلاصول ، د جاسوسانو او وطنفروشانو د ملک د تجزيې دسيسې شڼډول او د دوی ناولي ارمانو په خوا کې ور اچول، په ټول هېواد کې د کامل امنيت راوستل او هر افغان ته د اطميناني ژوند کولو محيط برابرول، د غلا، غصب، قاچاق، رشوت او اخلاقي فساد له منځه وړل، د مخدره موادو د کر، توليد، ترافيک، ذخیره کولو او تجارت ضد انساني کاروبار صفر ته رسول د يوه پروفيشنال او تخصصي مديريت ثبوت نه و؟

بناا په طالبانو د مديريت او د اداري تشکيلاتو په راس کې د ملا صاحبانو تقرر د امورو د چټکو، مؤثرو، مفيدو او د فساد نه خالي اجراأتو لپاره په دې وخت کې ډېر ضروري او حياتي کار دی چې بايد صورت ونيسي، تر څو د تپل شوې ادارې او نورو پخوانيو استبدادي واکداريو په شان يو تعداد فرصت طلبه، فاسد، نفس پرسته، خودخواه، جاسوس، وطنفروشه، غلام ذهنه او دين ،اولس، وطن ته خايين عناصر د متخصص ، کارپوه ، مسلکي او ماهر په نامه د چور، غلا ، فساد، اختلاس او قاچاق د ترويج، تقويې او پراختيا لپاره مديريت او منجمنټ په لاس کې وانخلي او د خپلو شخصي منافعو لپاره  ټولنه لکه د پخوا په شان د تراژيديو او مصيبتونو ډګر ونه ګرځوي.

د اسلامي امارت د مديريت او منجمنټ او يا د امورو د اجرا پاليسي تر کومه ځايه چې زه اورم، لولم ،وينم  او معلومات لرم، د اداري او مديريتي ماموریتونو انحصار او د نورو محرومول نه دي، بلکې په کراتو يې ټول صادق، ديندوسته، وطندوسته، اولسدوسته او انساندوسته  متخصصين، علمي -فني کدرونه، کارپوهان او ماهرين د وطن د خدمت، ابادۍ، ترقۍ، رفاه او په ځان بسياتوب لپاره دعوت کړي او کوي يې، خو مهم شرط په کې دا دی، چې د مديريتي منصبونو د حاصلولو لپاره د مينيجرۍ د  تخصص تر څنګ تقوا، صداقت، خدمت او تعهد بايد ولري او د شخصي مفاداتو -تمايلاتو او خواهشاتو په ځای ديني-ملي ګټو ته اولويت ورکول به په کې بارز او فيصله کوونکي رول لري.

په اسلامي امارت کې مديريت، څوکۍ او منصب امتياز نه دی، بلکې د حساب ورکولو په بنياد ماموريت دی، چې هدف ترې د ولس او وطن خدمت کول دي، نه باداري، عياشي، فساد (سياسي، اقتصادي،اخلاقي او فرهنګي).

نو ای دين، اولس ،وطن، استقلال او ټولنيز عدالت ته تږيو او غوښتونکو افغانانو!
د بې مورده اعتراضونو، بهانو او پلمو  په ځای زموږ غمځپلي هېواد او مظلوم ولس ته د اسلامي امارت د ديني، ملي قيادت د الهي لورينې د طلايي چانس نه ګټه پورته کړئ او د خپلو فزيکي، علمي، تخصصي، فني، تخنيکي، تکنالوژيکي وړتياوو او ظرفيتونو په کار اچولو د وطن او ولس سره د مينې ادعا په عمل کې پياده  او د خپل ولس د هوساينې او د افغانستان د ترقۍ او ابادۍ ارمان او خيال په واقعيت بدل کړئ. ان شاء الله دا وطن به اباديږي او د تاريخي استبداد، بې عدالتۍ او ظلمونو ټغر به ستاسو په اخلاصي فعاليتونو د ابد لپاره ټوليږي.

والسلام