د امريکا ولسمشر يو ځل بيا د کابل هوايي ډګر ته څېرمه د چاودونو خبرداری ورکړی

نن ټکی اسیا (یکشنبه، ۷ وږي، ۱۴۰۰ل): د امریکا متحده ايالتونو ولسمشر جو بايډن يو ځل بيا خبرداری ورکړی، چې د کابل حامد کرزي هوايي ډګر ته څېرمه چاودنې کېدای شي.

دوه ورځې مخکې هم د کابل هوايي ډګر ته څېرمه دوو چاودنو د ۱۳ امريکايي او ۲ پوځيانو په شمول ۱۷۰ کسان وژلي او له سلو زيات يې ټپيان کړي وو.

له دغو چاودنو دوه ورځې مخکې هم د امريکا ولسمشر د چاودنو خبرداری ورکړی و او اوس يې يو ځل بيا د چاودنو وړاندوينه کړې ده.
خو له خونړيو چاودو وروسته د کابل هوايي ډګر شاوخوا کې زرګونه کسان امريکا او نورو غربي هېوادونو ته د تګ لپاره هماغسې په ګڼ شمېر کې ولاړ دي او اوس هم هڅه کوي، چې امريکا او کاناډا ته لاړ شي.

امريکايي رسنيو د ولسمشر جو بايډن له قوله ليکلي، چې تر راتلونکو ۲۴ تر ۳۶ ساعتونو پورې د کابل هوايي ډګر ته څېرمه د چاودنو قوي امکان شته.

جو بايډن ويلي، امريکايي قومندانانو د باوري معلوماتو پر بنسټه ده ته معلومات ورکړي، چې په راتلونکو دوو ورځو کې د قوي چاودنو امکان شته.

د يادونې وړ ده، چې وړمه شپه د امريکا دفاع وزارت «پنټاګون» ویلي و، چې د ننګرهار ولايت مرکز جلال اباد په شپږمه ناحيه کې يې د داعش ډلې هغه قومندان وژلی، چې د کابل پر هوايي ډګر يې د برید پلان جوړ کړی و.