افغانستان

روسیې په افغانستان او تاجکستان د آرام پاتې کېدو غږ کړی

نن ټکی اسیا (جمعه، ۹ تله، ۱۴۰۰ل): روسیې په افغانستان او تاجکستان غږ کړی څو هرډول خپلمنځي لانجې د خبرو له لارې حل کړي.

ټاس خبري آژانس د روسیې د بهرنیو چارو وزارت ویاند «الکسي زیاتسیف» په حواله خبر ورکړی، چې مسکو د افغانستان او تاجکستان ترمنځ د اړیکو د تاؤجن کېدو له امله اندېښمن دی او سرحدي سیمو ته د دواړو هېوادونو لخوا د پوځیانو استولو موضوع له نږدې څاري.

یاد روسي چارواکي د خپلو سرچینو په حواله ویلي، چې طالبانو په دې وروستیو کې زرګونه افغان پوځیان د تخار په سرحدي ولایت کې ځای پرځای کړي دي.

په ورته مهال رویټرز آژانس بیا خبر ورکړی، چې د افغانستان اسلامي امارت او تاجکستان د بهرنیو چارو وزارتونو په سرحدي سیمو کې د پوځي تحرکاتو په اړه تراوسه څه ویلي نه دي.

له افغانستان څخه د امریکايي ځواکونو له وتلو او اسلامي امارت د واکمنۍ له ټینګېدو سره همهاله د تاجکستان ولسمشر امام علي رحمانوف د افغانستان په اړه لانجمنې څرګندونو ته زور ورکړی، چې له امله یې د اسلامي امارت د چارواکو او عامو افغانانو توند غبرګونونه راپارولي دي.

د تاجکستان ولسمشر امام علي رحمانوف د شانګهای د همکارۍ سازمان هېوادونو په ناسته کې د افغانستان وضعیت خواشینوونکی بللی او غوښتنه یې کړې وه، چې باید افغانستان ته څېرمه امنیتي کمربند رامنځته شي.

نوموړي تردې وړاندې په پنجشیر کې د افغان ځواکونو لخوا پر تصفیوي عملیاتو او همدغه راز د اسلامي امارت د کابینې په تشکیل هم نیوکه کړې وه او هغه یې د نه منلو بللې وه.

د اسلامي امارت د رئیس الوزراء مرستیال ملا عبدالغني برادر له الجزیرې ټلویزیون سره په مرکه کې د امام علي رحمانوف یادې څرګندونې د افغانستان په چارو کې لاسوهنه بللې او خبرداری یې ورکړی، چې هر عمل عکس العمل لري.

تاجکستان چې د پخواني شوروي اتحاد له شړېدو وروسته یې خپلواکي ترلاسه کړې او دا مهال په کې د روسیې فدارسیون یوه ستره پوځي اډه شتون لري، دوه میاشتې مخکې په شمال کې د اسلامي امارت د ځواکونو له پرمختګ سره همهاله یې له روسي پوځیانو سره ګډ پوځي تمرینات ترسره کړل او روانه اونۍ په تخار ولایت کې د طالبانو لخوا د منصوري«استشهادي» کنډک د قطعاتو د ځای پرځای کولو په غبرګون کې په خپلو دوو سرحدي ولایتونو کې پوځي نمایشونه ترسره کړل.

که څه هم طالبانو د روسي چارواکو د څرګندونو په هکله څه ویلي نه دي؛ خو باختر خبري آژانس څو ورځې مخکې خبر ورکړ، چې د اسلامي امارت د منصوري قطعې لسګونه سرتیري د تخار ولایت مرکز او شاوخوا سیمو کې د امنیت د تأمین په خاطر ځای پرځای شوي دي.

د تخار د اطلاعاتو او فرهنګ ریاست سرپرست مولوي انصارالله ددغو ځواکونو پرځای کول یوازې د کورني امنیت لپاره بللي او هغه اندېښنې یې بېځایه بللي چې ګواکې د منصوري«استشهادي» قطعې ځواکونه به ګاونډیو هېوادونو ته ګواښ پېښ کړي.

دا په داسې حال کې ده چې تیره اونۍ د منصوري «استشهادي» کنډک سلګونه پوځیان چې په سپکو او درنو وسلو او هوايي ځواک سمبال وو، په کندوز ښار او هوايي ډګر کې ځای پرځای شول.

ورته لیکنې

ګډون وکړئ
خبرتیا غوښتل د
guest

1 Comment
زړو
نویو ډیرو خوښو شویو
Inline Feedbacks
ټولې تبصرې کتل
محمد

وایي د بزې -ونه چې وتخنېږي، د شپانه ډوډۍ خوري. اوس امام علي رحمانوف هم همدا لوبې کوي.

Back to top button
1
0
ستاسو نظر مونږ ته دقدر وړ دی، راسره شریک یې کړئx