ټولنیزه برخه

ای مسلمانې خورکۍ د مسلمانو په ضد مه جنګيږه!

عبدالرقيب رقيب

ای مسلمانې خورکۍ! ايا په فتنه کې د خپلو وروڼو ښکيلول غواړې؟
ايا غواړې چې د شیطان په لښکرو کې د ﷲ ﷻ او رسول صلی الله علیه وسلم په وړاندي سنګر شې؟
ايا غواړې چې د ځان او پیغمبر صلی الله علیه وسلم ترمنځ د دښمنۍ اعلان وکړې؟
ايا اسلام ته په غوسه يې؟!

يوه پوښتنه کوم:
که په ځمکه کې تنور جوړ شي، اور پکې بل شي او تاته وويل شي چې ځان ورپکي واچوه!
ايا ځان به هماغه اور ته واچوې؟
ايا هماغه اور ته به ټوپ کړې؟

که ډير خلک او مختلف ټولګي دې ليدلې چې د اور خندق ته خپل ځانونه غورځوي نو ستا پرېکړه به څه وي؟

ايا ته به وايي هغه کوم چې خلک يې کوي؟ او که به له عقل نه کار اخلې او وايې به چې نه غواړم د اور سکروټه شم!.

ای مسلمانې خورکۍ!

ايا د رسول الله ﷺ فرمان دې نه دی اورېدلی چې فرمايي: «د اور دوه ډلې چې ما ليدلې نه دي: يوه هغه چې د غوايانو د لکيو غوندې قمچينې ورسره وي خلک ورباندې وهي، بله ډله هغه ښځې دي چې پټې دي خو په عين حال کې لوڅې دي» روايت د مسلم ده.

که تاته وويل شي:
ايا ته له دغه ټولي ځينې يې؟
د ځان تېر وېستلو کوشش مه کوه – ايا ته د پټوالي په حالت کې لوڅه يې؟
د دې لپاره چې خبره روښانه وي بايد ووايو:
يو انسان چې لوڅ وي نو څه يې ښکاري؟
د اندامونو څومره‌والی يې ښکاري؟ ايا دغسي نه ده؟
څوک چې تا په دغو جامو کې وويني ايا د اندامونو حجم دې نه‌شي تشخيصولای؟
ځواب ښکاره دی، له تا يې د اوريدلو سوال نه کیږي!

ای مسلمانې خورکۍ!
ته ولي خپل ځان د شيطان د لوبو آله ګرځوې؟ ولې له ځانه د شيطان اسلحه جوړوې؟!

ايا ته نه پوهيږې چې شيطان ويلي دي: «قَالَ فَبِعِزَّتِكَ لَأُغْوِيَنَّهُمْ أَجْمَعِينَ. إِلَّا عِبَادَكَ مِنْهُمُ ٱلْمُخْلَصِينَ )82-83( ص.
ژباړه: ابليس وويل: نو ستا په عزت قسم! هرومرو به هغوی ټول بې لارې کړم، پرته، ستا له هغو بندګانو څخه چې تا د دوى له جملې ځینې غوره کړيدي.

ای مسلمانې خورکۍ!

ايا ته غواړې چې مسلمانان اور ته وغورځول شي؟
ايا ته غواړې چې هغوی په اور کې وسوځول شي؟
ايا ته له مسلمانانو غواړې چې د خپل رب په مقابل کې جګړه وکړي؟ غواړې چې د خپل رب حکمونه له کاره وغورځوې؟!

ﷲ ﷻ خو مؤمنانو ته امر کړی او فرمايي: «قُل لِّلْمُؤْمِنِينَ يَغُضُّوا۟ مِنْ أَبْصَـٰرِهِمْ وَيَحْفَظُوا۟ فُرُوْجَهُمْ ﴿٣٠﴾ النُّور-٢٤.
ژباړه: مؤمنانو ته ووايه چې خپلې سترګې ټيټې کړي او خپل شرم‌ ځايونه وساتي…»

ايا قسم دې کړی چې دغه قراني آيت به له منځه وړې؟ ايا قسم دي کړی چې ضرور به خلک خپل بدن ته تشويقوې ترڅو تاته وګوري او د ﷲ ﷻ په غضب اخته شي؟!
له چا سره په جنګ يې؟

ای مسلمانې خورکۍ!
ته باوري يې چې ښځه د سړيو مطلوب ده؛ د سړيو طبيعت همداسې عيار شوی چې ښځې ورته زينت ښکاري، شهوت يې پاروي؛ الله تعالی فرمایې: «زُيِّنَ لِلنَّاسِ حُبُّ ٱلشَّهَوَٰتِ مِنَ ٱلنِّسَآءِ » آل عمران – 14.
ژباړه: خلکو ته نفسي غوښتنې چې ښځې دي… د ډيرې مينې وړ ګرځول شوې دي…

ای مسلمانې خورکۍ! ستا له دغې بربنډې جامې نه هدف څه ده؟

ايا له ﷲ ﷻ نه سوا بل رب غواړې?!
ایا له محمد مصطفی ﷺ نه سوا بل پيغمبر غواړې?!
او که له اسلام نه سوا بل دين غواړې?!
او که دا هيڅ بدلول نه غواړې، په الله د خپل رب په توګه خوښه يې، په اسلام د خپل دين په توګه خوښه يې او په محمدﷺ د نبي په توګه خوښه يې؟!

طبعًا، ته وايې چې له ﷲ ﷻ سره، د ﷲ ﷻ له دين سره او د ﷲ ﷻ له رسول ﷺ سره مينه لرم!

بايد ووايو چې د مينې دعوه اسانه ده، خو اثبات يې دليل غواړي.

له ﷲ ﷻ او اسلام سره ستا د مينې دليل څه ده؟ ايا د ﷲ ﷻ له فرمان نه ښکاره بغاوت او د اسلام په احکامو پښه ايښودل د مينې خلاف کړنې نه دي؟!

که وايې:
زه خو تنها نه يم، ټول د اسلام له ځينې حکمونو سرغړونه کوي. ټولې نجونې دغسې جامې په تن کوي؛ نو ولې يواځې زه شاته پاتې شم!.

نو بايد ووايو:
ايا ﷲ ﷻ ته سخته ده چې ټولو هغو خلکو ته سزا ورکړي چې د اسلام له حکمونو شاته شوي دي؟! اګر که د ټول جهان خلک وي!
که ټول خلک مخ په وړاندې جهنم ته روان وي او ته ورنه شاته پاتې شې، ستا لپاره ضرر څه ده؟
ايا ته په دغه خفه کيږې چې له جهنميانو نه پاتې شې؟!

ايا تاته بده ښکاري چې له هغو ملګرو سره نه يې چې په جهنم کې لوغړيږي؟!

ايا ته نه پوهيږي، کله چې نافرمانه ټولی جهنم ته راوستل شي د دوی حال به څه وي؟

وَسِيقَ ٱلَّذِينَ كَفَرُوٓا۟ إِلَىٰ جَهَنَّمَ زُمَرًا ۖ حَتَّىٰٓ إِذَا جَآءُوهَا فُتِحَتْ أَبْوَٰبُهَا وَقَالَ لَهُمْ خَزَنَتُهَآ أَلَمْ يَأْتِكُمْ رُسُلٌ مِّنكُمْ يَتْلُونَ عَلَيْكُمْ ءَايَـٰتِ رَبِّكُمْ وَيُنذِرُونَكُمْ لِقَآءَ يَوْمِكُمْ هَـٰذَا ۚ قَالُوا۟ بَلَىٰ وَلَـٰكِنْ حَقَّتْ كَلِمَةُ ٱلْعَذَابِ عَلَى ٱلْكَـٰفِرِينَ ﴿٧١﴾ الزُّمَر-٣٩
ژباړه: او هغه کسان به ډلې ډلې دوزخ ته بوتلل شي چې کفر يې کړی دی تر دې چې کله ورته را ورسيږي؛ دروازې به يې ورته پرانستل شي او د هغه ساتونکي به ورته ووايي: ايا له تاسې څخه رسولان نه وه درته راغلي چې ستاسې د پالونکي آيتونه يې درته لوستلای او د دغې ورځې له مخامخېدو يې وېرولای، هغوی به ووايي: ولې نه، خو د سزا خبره پر کافرانو ثابته شوه.
قِيلَ ٱدْخُلُوٓا۟ أَبْوَٰبَ جَهَنَّمَ خَـٰلِدِينَ فِيهَا ۖ فَبِئْسَ مَثْوَى ٱلْمُتَكَبِّرِينَ ﴿٧٢﴾ الزُّمَر-٣٩
و به ويل شي: د دوزخ په دروازو ننوځئ، تل به پکې ياست ځکه د لويي کوونکو ډېر بد استوګنځی دی.

ای مسلمانې خورکۍ!
ﷲ ﷻ مو خپل اطاعت ته بيا بيا رابولي, له سرکشۍ نه مو راګرځوي او فرمايي:
وَأَنِيبُوٓا۟ إِلَىٰ رَبِّكُمْ وَأَسْلِمُوا۟ لَهُۥ مِن قَبْلِ أَن يَأْتِيَكُمُ ٱلْعَذَابُ ثُمَّ لَا تُنصَرُونَ ﴿٥٤﴾ الزُّمَر-٣٩
او پالونکي ته مو وروګرځئ او هغه ته غاړه كښېږدئ مخکې له دې چې عذاب درته راشي بيابه مو مرسته نه كيږي!.

ايا پوهيږئ چې که د ﷲ ﷻ له نافرمانۍ څخه لاس نه اخلو نو حال به مو څه وي؟!

أَن تَقُولَ نَفْسٌ يَـٰحَسْرَتَىٰ عَلَىٰ مَا فَرَّطتُ فِى جَنۢبِ ٱللَّهِ وَإِن كُنتُ لَمِنَ ٱلسَّـٰخِرِينَ ﴿٥٦﴾
ژباړه: داسې نه، چې څوک ووايي: ای افسوس! زما پر هغه ناغېړۍ چې د الله په اړه مې کړې ده او رښتيا خو دا ده چې زه (د الله په حکمونو) له ملنډو وهونکو وم.
أَوْ تَقُولَ لَوْ أَنَّ ٱللَّهَ هَدَىٰنِى لَكُنتُ مِنَ ٱلْمُتَّقِينَ ﴿٥٧﴾
يا ووایي: “كاشكي الله ما ته هدايت کړی واى، نو زه به هم له پرهېزګارانو څخه وم.
“أَوْ تَقُولَ حِينَ تَرَى ٱلْعَذَابَ لَوْ أَنَّ لِى كَرَّةً فَأَكُونَ مِنَ ٱلْمُحْسِنِينَ ﴿٥٨﴾ الزُّمَر-٣٩
يا كله چې عذاب وويني، ووايي: كاش چې ماته يوځل (دنيا ته) د ورګرځېدو فرصت وای؛ نو له ښېګڼه كوونكو به شم.
مګر کله دغسې کيدای شي…

ايا ته پوهيږې چې هغه وخت به په ځواب کې څه ورته ويل کيږي؟!

بَلَىٰ قَدْ جَآءَتْكَ ءَايَـٰتِى فَكَذَّبْتَ بِهَا وَٱسْتَكْبَرْتَ وَكُنتَ مِنَ ٱلْكَـٰفِرِينَ ﴿٥٩﴾ الزُّمَر-٣٩
ژباړه: ولې نه، تاته زما ايتونه راغلي و؛ بيا دې درواغ وګڼل او لويي دې وکړه او ته له کافرانو وې.

ايا ته پوهيږې د عذاب د ليدلو په وخت کې به انسان څه وايي؟!
وَلَوْ تَرَىٰٓ إِذْ وُقِفُوا۟ عَلَى ٱلنَّارِ فَقَالُوا۟ يَـٰلَيْتَنَا نُرَدُّ وَلَا نُكَذِّبَ بِـَٔايَـٰتِ رَبِّنَا وَنَكُونَ مِنَ ٱلْمُؤْمِنِينَ ﴿٢٧﴾ الأنعَام-٦
ژباړه: او كه ووينې کله چې هغوی پر اور ودرول شي؛ نو وايي: كاشكې موږ وګرځول شو څو د خپل پالونکي ايتونه درواغ ونه ګڼو او له مؤمنانو شو.

ای مسلماني خورکۍ!
ته څه وایې…؟
ایا لا هم د خپل پالونکي په وړاندي په جګړه باندې ټینګار لرې؟!
ایا لا هم د الله او د هغه د رسول په وړاندې د مقابلې توغ پورته‌ کوې؟!

خپل رب ته به څه ځواب وایو چې کله وفرمایي:
«أَلَمْ تَكُنْ آيَاتِي تُتْلَى عَلَيْكُمْ …? [ المؤمنون : 105 ] ژباړه: ایا زما آیتونه تاسې ته نه لوستل کیدل؟!

ای مسلمانې خورکۍ! د دې پوښتنې ځواب به دې څه وي؟
شک نه‌شته چې ته به هڅه وکړې چې عذرونه وړاندې کړې د ځان د سپیناوي لپاره به دلائل ووایې او وبه وایې چې شیطان دوکه کړې وې، وبه وایې چې انساني شیطانانو درته باطلې کړنې ښایسته کړې وې لکه هغه نور چې به وایي: «رَبَّنَا غَلَبَتْ عَلَيْنَا شِقْوَتُنَا وَكُنَّا قَوْمًا ضَالِّينَ – رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُونَ ? [ المؤمنون 106 ، 107
ژباړه : ای زموږ پالونکيه! په موږ باندې زموږ بدبختي غالبه شوې وه او موږ لار ورکي خلک وو. ای زموږ پالونکيه! موږ له دې (جهنمه) وباسه؛ که بیا هغو(ګناهونو) ته ور ورګرزیدو نو بې شکه موږ به ظالمان یو.

ای مسلمانې خورکۍ!
پوهیږې دغسې خلکو ته به څه ځواب ورکړ شي؟!
ورته به ووایې : « اخْسَؤُوا فِيهَا وَلَا تُكَلِّمُونِ – إِنَّهُ كَانَ فَرِيقٌ مِّنْ عِبَادِي يَقُولُونَ رَبَّنَا آمَنَّا فَاغْفِرْ لَنَا وَارْحَمْنَا وَأَنتَ خَيْرُ الرَّاحِمِينَ فَاتَّخَذْتُمُوهُمْ سِخْرِيًّا حَتَّى أَنسَوْكُمْ ذِكْرِي وَكُنتُم مِّنْهُمْ تَضْحَكُونَ ? [ المؤمنون : 108 ، 109 ]. 110 ]

اوس خو په دغو مؤمنانو پسې رشخند وهل کیږي او ګومان کیږي چې دوی شاته پاته خلک دي، د دوی پتمنه جامه او مستورې څېرې مسخره کیږي!
ایا دغسي نه ده؟!
نو ای خورکۍ! موږ درته وایو:
د دغو پتمنو مکافات به د الله په دربار کې څه وي چې په دنیا کې ورباندي لادینه خلک رشخند وهي؟

الله تعالی فرمایي: إِنِّي جَزَيْتُهُمُ الْيَوْمَ بِمَا صَبَرُوا أَنَّهُمْ هُمُ الْفَائِزُونَ ? المؤمنون : 111 ].
ژباړه: بې شکه دوی ته مې نن ورځ د دوی په صبر بدله ورکړه او بې شکه همدوی بریمن دي.
دوی د الله امر ته غاړه کېښوده او په یوه بله بهانه یې بغاوت ته لاره ونه‌کړه…
ایا دغه خلک چې نن درته باطل ښایسته کوي او دفاع درنه کوي ایا د الله په وړاندې به دفاع درنه وکړي؟ ایا ستا د عذاب نه یوڅه برخه به درنه په ځان کړي؟

نه،هیڅکله نه… د دوی انجام به هغسې وي چې الله تعالی یې فرمایې:
وَبَرَزُواْ لِلّهِ جَمِيعًا فَقَالَ الضُّعَفَاء لِلَّذِينَ اسْتَكْبَرُواْ إِنَّا كُنَّا لَكُمْ تَبَعًا فَهَلْ أَنتُم مُّغْنُونَ عَنَّا مِنْ عَذَابِ اللّهِ مِن شَيْءٍ قَالُواْ لَوْ هَدَانَا اللّهُ لَهَدَيْنَاكُمْ سَوَاء عَلَيْنَآ أَجَزِعْنَا أَمْ صَبَرْنَا مَا لَنَا مِن مَّحِيصٍ ? [ إبراهيم : 21 ].
ای مسلمانې خورکۍ! ایا ته ګومان کوې چې الله تعالی درباندې ظلم کړی؟! په خپل پالونکي دې څه شک دی؟!

ای خورکۍ!
که عطر استعمال کړې او ټول خلک درته ووایي چې د دغو عطرو بوی یې ځوروي څه پرېکړه به کوې؟
بې شکه چې له دغسې عطرو به ډډه کوې ترڅو خلک ازار نه‌ شي. ایا دغسي نه ده؟

او که بیا هم په خپله کړنه ټینګار کوې او دغه عطر کارولو ته دوام ورکوې نو په ټولنه کې به سرټمبه کڼله کېږې! دغسې نه ده؟
نو که خپل رب دي درته وفرمایې چې ستا دغه لوڅه او تنګه جامه یې ځوروي!

که خپل رب دي درته ووایې چې له پرديو سره ستا ناسته‌ ولاړه، ګرځیدا او غږیدا یې ځوروي!
ایا ته به د خپل رب لپاره له دغسې جامې او د پردیو سره له ګرځیدا تېره شې؟ او که به د الله په وړاندې عناد او سخت‌ دریځۍ ته دوام ورکړې؟!

ته به وایې چې زما په دغسې جامه نو الله ځوریږي؟ زما په دغسې ژوند نو الله ځوریږي؟ هو بالکل

ایا د الله تعالی فرمان دې نه دی اوریدلی:
إِنَّ الَّذِينَ يُؤْذُونَ اللَّهَ وَرَسُولَهُ لَعَنَهُمُ اللَّهُ فِي الدُّنْيَا وَالْآخِرَةِ وَأَعَدَّ لَهُمْ عَذَابًا مُّهِينًا ? [ الأحزاب : 57
ژباړه: څوک چې الله او د هغه رسول ته اذیت رسوي، الله ورباندې په دنیا او آخرت کې لعنت کړی دی او دوی لره یې رسوا کوونکی عذاب تیار کړی دی.

او تاته دې وویل شي ای مسلمانې خورکۍ!

کله چې الله د څه په اړه پریکړه وکړي ایا تا لره یې د قبول او رد انتخاب شته؟!

ایا خبره داسې مرحلې ته رسیدلې ده چې د الله حکم ته په سپکه وګورې!
الله خو مؤمنانو ته داسې فرمایې:
وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا ? [ الأحزاب : 36 ].
ژباړه: هیڅ مؤمن او مؤمنې ته دا حق نشته چې کله الله او د هغه رسول د کومې معاملې په اړه پرېکړه وکړي، چې دوی بیا د هغې په اړه اختیار ولري او څوک چې د الله او د هغه د رسول نه سرغړاوی وکړي نو هغه په څرګنده ګمراهۍ کې وغورځید.

او ای مسلمانه ورور!
د دې په ځای چې خپله خورکۍ له پردیو وساتې او د اور له لمبو یې لري کړې؛ متأسفانه چې په ډیره نامردانګۍ اخته یې مظلومه خورکۍ د شیطان دام ته ټېله کوې او د جهنم عذاب ته یې برابروې.

دغه مېرمنې خو ستا په اشارو دغه جامې خوښوي!
ستا په بیا بیا کتلو دغسې د پردیو رواجونه خپلوي او اسلامي رنګ بدلوي.
دوی خو ستا په غوښتنه ستا څنګ ته درځي!
که ته د الله په لاره برابر شې او ته خپل وجدان ته تسلیم شې نو ولې به دا سپېڅلې خویندې په دې چټل ډنډ کې لویږي!
که ته د الله دغه فرمان په ځان عملي کړې چې فرمایې:
{قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ (30)} [النور: 30] ژباړه: او مؤمنو نارینه‌ و ته ووایه چې: خپلې سترګې ټیټې کړي او د خپلو شرم‌ځایونو ساتنه وکړي، دا ورلره پاکه کړنلاره ده. په رښتیا الله په هغه څه خبر دی چې دوی یې کوي.

الله تعالی خو داسي فرمایې:
اعْمَلُوا مَا شِئْتُمْ إِنَّهُ بِمَا تَعْمَلُونَ بَصِير? [ فصلت : 40 ].
ژباړه: څه چې غواړئ وه‌یې کړئ! الله ستاسې ټولې کړنې ویني.

یادونه: دا لیکنه په یوڅه بدلون سره د سعید محمد السواح له عربي رسالې نه اخذ شوې ده.

عبدالرقیب رقیب

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x