زما دلبر/ نومير

فدامحمد نومير

په حسينو کې حسين زما دلبر دی
خوږ تر شاتو او ګبين زما دلبر دی

لمر سپوږمۍ یې د ښايست څخه مخ پټ کړی
څومره ښکلی سور او سپين زما دلبر دی

شين ګنبد هم د خضرا ورسره خوند کا
شنو جامو کې نازنين زما دلبر دی

که په حسن کې صفت د يوسف کيږې
په خوبانو کې ثمين زما دلبر دی

مصريان نه رسي زما د يار ښايست ته
په يثريب کې ماه جبين زما دلبر دی

انس و جن ته رهنمأ را ليږل سوی
د هر چا خوله کې امين زما دلبر دی

پرې راوړی جبرائيل اخير کتاب دی
نازولی په ياسين زما دلبر دی

نبوت د انبياؤ پرې شو ختم
هم اول هم اخرين زما دلبر دی

رب ستايلی دی په خلق عظيم باندې
حسن و خلق باندې تزيين زما دلبر دی

د نومير مال او ځان ترينه قربان سه
بې مثاله بهترين زما دلبر دی

متحده ايالات، کلفورنيا