امریکا له حماس نه د اسرایيلي عسکر د سمدستې پرېښودلو غوښتنه وکړه

نن ټکی اسیا(شنبه،زمري۱۱مه،۱۳۹۳ل):د امریکا ولسمشر بارک اوباما په فلسطین کې د حماس له جهادي ډلې نه وغوښتل،چې د جمعې په ورځ نیول شوی اسرائیلي عسکر  دې په غیر مشروط ډول ژر تر ژره خوشي کړي.

 سپينه ماڼۍ وايي، چي حماس باید سمدستي او له قید او شرطه پرته هغه اسرائیلي عسکر خوشي کړي چي پرون د جمعې په ورځ د دوی نظامي مبارزینو نیولی دی.

اوباما وویل چې که اسرائیل او نړیواله ټولنه په دې باور ونه لري چې حماس دې د حملو په بندولو کې خپلې وعدې پرځای کړي، نو دابه ډیره سخته وي چې اوربند دې بیرته نافذ کړای شي.

 اوباما دا په تکرار وویل چي اسرائیل دا حق لري چې د حماس د راکټي حملو دفاع وکړي، مگر هغه د فلسطین د ملکي وگړو وژل زړه دردونکي وبلل او ویې ویل چې د هغوی د ساتنې او حفاظت لپاره باید هرڅه وشي.

نوموړي پر حماس باندې د اوربند د ماتولو تور پورې کړ. ده وویل، چې حماس له اوربند یوازې ۹۰ دقیقې وروسته دوه اسرائیلي عسکر وژلي او یو یې ژوندی یرغمل کړی.

بل پلو بیا حماس هغه راپورونه رد کړي، چې اوربند دوی مات کړی او ګوندي اسرائیلي عسکر دې یې هم له اوربند وروسته نیولی وي.د حماس د سیاسي دفتر مرستیال وايي چې دا عسکر (ادیر ګولډرن) نومیږي او د جمعې په ورځ له اوربند څخه یو نیم ساعت وړاندې د سهار په (۶:۳۰) بجې نیول شوی دی.

د امریکا ولسمشر په خپلو څرګندونو کې همداراز وویل، چې د غزې ناورین مایوسه کړی، خو بیا یې هم په خپلو څرګندونو کې په ډاګه له اسرائیلو دفاع کوله.

په داسې حال کې چې ملګري ملتونه هم پر دې اعتراف کوي، چې په غزه کې د اسرائیلو له یرغل را په دې خوا کابو اتیا سلنه مرګ-ژوبله او نور زیانونه ملکي وګړو ته اوښتي، خو د امریکا ولسمشر د حماس او غزې له تلفاتو نه په صرف نظر یوازې د اسرائیلو مرګ-ژوبله د نه زغم وړ وبلله.