تهران سبا د افغانستان په اړه د مهمې غونډې کوربه دی

نن ټکی اسیا (سه شنبه، ۴ لړم، ۱۴۰۰ل): سبا ته د ایران پلازمېنې تهران د افغانستان په اړه د ګاونډيو هېوادونو د مهمې غونډې کوربه دی.

په کابل کې د ایران سفارت ويلي، په دغه ناسته کې به هڅه وشي، چې د افغانستان او سيمې مسائلو په اړه ځانګړی پرېکړه ليک خپور شي.

د ایران د بهرنيو چارو وزارت وياند سعيد خطيب زاده ويلي، په دغه ناسته کې به د افغانستان سياسي، اقتصادي، امنيتي او د ټول شموله حکومت په اړه هم خبرې اترې وشي.

سره له دې، چې دغه ناسته د ایران په کوربه‌توب جوړيږي، خو مشري به يې د چين د بهرنيو چارو وزير وانګ يي کوي او پرانيستونکې وینا به ورته د ایران ولسمشر کوي.

د پاکستان، تاجکستان، ازبکستان او ترکمنستان د بهرنيو چارو وزیران به په دې ناسته کې حضوري او د چين او روسيې د بهرنيو چارو وزیران به انلاين ګډون کوي.

د ایران د بهرنيو چارو وزارت وياند سعيد خطيب زاده ويلي، د ملګرو ملتونو سرمنشي انټونيو ګويتریش به هم دغې غونډې ته خپل پيغام ولېږي.

د افغانستان اسلامي امارت مسؤولينو ته په دې ناسته کې د ګډون بلنه نه ده ورکړل شوې، خو افغان حکومت هيله‌من دی، چې دغه ناسته به د افغانستان د خير او سوکالۍ پر لور يو مهم ګام وي.

د افغانستان اسلامي امارت وياند ذبيح الله مجاهد ويلي: «زموږ ګاونډيان له موږ سره نه شلېدونکې اړيکې لري، ګاونډي هېوادونه بايد له افغانستان سره ډيپلوماټيکو، سوداګريزو او اقتصادي اړيکو ته وده ورکړي.»

د تهران سبانۍ غونډه د افغانستان په اړه د مسکو له ناستې يوه اونۍ وروسته جوړيږي.

د مسکو په ناسته کې د اسلامي امارت د لوړپوړو چارواکو سربېره د روسيې، چين، ایران، هند او پاکستان په شمول د لسو هېوادونو استازو او چارواکو ګډون کړی و.