شعـــــرونه

سپين سهار/ نومير

فدا محمد نومير

په تيارو پسې همېش ګوره رڼا وي
توره شپه کې څرک ښکاره تل د سبا وي

کوم وياله کې چې يو ځل اوبه وي تللې
بهيدل د اوبو بيا پکي بيا بيا وي

چې خدمت د کلي کور يې پيشه کړی
هغه کس د لوی واړه زړه کې بابا وي

څو چې خوږ نسي نو پوه به په خوږ نسي
هر يو خوږ ته د طبيب لاس کې دوا وي

چې دښمن نه وي صفت د دښمن څه دی
د مصلح سړي دښمن ټوله دنيا وي

په سختيو باندې صبر دی راغلی
چې سختي نه وي د صبر څه معنا وي

د دښمن مقابله وسي په صبر
د دښمن څخه ګيله لار د خطأ وي

ناهيلي د مسلمان سره نه ښايي
ناهيلي دين او دنيا لره بلا وي

که بې علمه تل ولاړ په خپل دريځ وي
د نادان د وعظ اغيز کله په چا وي

د فرعون هامان لښکرې چيرې لاړې
انتها د هر باطل اخير فنا وي

څوک چې کاندي د اوبو په وړاندې لوبه
ځان به غرق کا ځګ اخستی وارخطا وي

نومير وليد سپین سهار پس له تورتمه
خدای دې وکا د تورتم دا انتها وي

متحده ايالات، کلفورنيا

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx