شعـــــرونه

وینم خوب چې شپه به واوړي په لمر ګله/ کاروان

پيرمحمد کاروان

وینم خوب چې شپه به واوړي په لمر ګله
د سپوږمۍ سندره وایي قمرګله

درپسې به یو لښکر ګلونه راشي
را روان شه یه د غرونو د سر ګله

درمانګر شه د رنځورو میَنانو
په غروب کې د زېړي مازدیګر ګله

د افغان وطن اروا په تا تازه ده
غوڅ خو مه شې په لاره په خنجر ګله

ته وا ژوند په هدیره کې ټوکېدلی
چې په درز کې یې ولاړ د مرمر ګله

د بلبلو نغمه زېږدی سېل به راشي
ستا په پرخو یې لامده دي وزر ګله

چې په شتون دې روایات د نشتون مات شي
هله زر کوه راځه د اینځر ګله

پرې تر منځه یې تارونه د وږمو دي
ته یې وتړه د لرو د بر ګله

په نشه د کومې مستې مینې رنګ یې
که دې څښلي دي شراب د کوثر ګله

کړه زړګی د کاروان باغ د خدای د مینې
په کې ګل شه د وروستي پیغمبر ګله

۲۵ عقرب ۱۴۰۰ هجري شمسي، خوست توره وړۍ
کاروان

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x