لوګر کې د کرکټ سیالیو پرمهال شخړې له امله یو تن وژل شوی

نن ټکی اسیا (شنبه، ۶ لیندۍ، ۱۴۰۰ل): د لوګر ولایت په محمدآغې ولسوالۍ کې د کرکټ سیالیو پرمهال د شخړې له امله یو لوبغاړی وژل شوی دی.

دا پېښه نن د شنبې په ورځ ماسپښین دوه بجې هغه مهال رامنځته شوه، کله چې د کرکټ د غیر رسمي سیالیو یوې لوبه کې د لوبغاړو ترمنځ لفظي شخړه په فیزیکي هغې واووښتله.

د لوګر د کرکټ مسئول بشیر ساحل ددې خبر په تایید سره ویلي، چې په دې پېښه کې ۶  تنه نور لوبغاړي هم ټپيان شوي  دي.

وژل شوی لوبغاړی نجیب نومیږي؛ خو داچې شخړه څرنګه او د چا لخوا پیل شوه، په اړه یې د کرکټ مسئول څه نه دي ویلي.

باید وویل شي چې په افغانستان کې زیاتره لوبغاړي د لوبې د اصولو نه مراعاتولو له کبله د لوبې پای کې په شخړه اوړي او کله ناکله په کې خلکو او لوبغاړو ته مرګ ژوبله هم اوړي.