کابل کې جنايي او امنيتي پېښې په بې ساري توګه کمې شوي

نن ټکی اسیا (دوشنبه، ۸ لیندۍ، ۱۴۰۰ل): په هېواد د اسلامي امارت له واکمنۍ وروسته امنيتي وضعيت د تېرو شلو کلونو په پرتله په بې ساري توګه ښه شوی دی او د ژوند چارې په عادي ډول پرمخ روانې دي.

د کورنيو چارو وزارت وياند قاري سعيد خوستي په خپله ټوېټر پاڼه ليکلي دي چې نن دريمه ورځ ده چې په کابل ښار کې د جنايي او امنيتي پېښو کچه په بې سارې توګه راټيټه شوې ده.

#خوشبختانه
نن دریمه ورځ ده چې د کابل په ښار کې په ۲۴ ساعتونو کې د جنايي او امنيتي پيښو کچه په بې ساري توګه راټيټه شوې.
تیره ورځ مو دوه جنایي او یوه امنيتي پيښه درلوده وړمه ورځ او لا وړمه ورځ مو درې جنايي پيښې درلودې.
دا هرڅه د الله نصرت او د ولس فوق العاده همکاري ده.

— Qari Saeed Khosty (@SaeedKhosty) November 28, 2021

ښاغلي خوستي ليکلي چې تېره ورځ يې په کابل کې دوه جنايي او يوه امنيتي پېښه درلوده او وړمه ورځ يې درې جنايي پېښې درلودلې.

بايد وويل شي چې تېر شل کلونه د پلازمينې کابل په شمول په ټول هېواد کې هره ورځ لسګونه امنيتي او جنايي پېښې کېدلې چې واک ته د اسلامي امارت له رسېدو وروسته دا ګراف راښکته شوی دی او په امنيتي او جنايي پېښو کې په بې ساري توګه کموالی راغلی دی.

د اسلامي امارت امنيتي او استخباراتي مسؤلين هم وخت په وخت په خپلو ويناوو او اعلاميو کې ولس ته د امنيتي وضعيت د لا ښه کولو ټټر وهي او دا هغه څه دي چې عام افغانان يې له تېرو شلو کلونو هيله درلوده.
د چارو څارونکي د هيواد ډاډمن امنيت، اقتصادي او ټولنيز پرمختګ او د عامو افغانانو د هوسا ژوند لپاره د طالبانو مهمه لاسته راوړنه بولي.

د کابل ښار سوداګر او اوسېدونکي هم د اسلامي امارت په راتګ سره خوښ دي او وايي چې اوس په ښار کې د ارامۍ احساس کوي او د غلو، انسان تښتونکو او نورو مشکلاتو وېره يې ختمه شوې ده.