لويه ربه حال زما د قوم بدل کړې/ نومير

فدامحمد نومير

لويه ربه حال زما د قوم بدل کړې
دا سختۍ او پريشانۍ ته پرې سهل کړې

چارچاپيره را چاپير ټول غليمان دي
غليمان د افغانانو په پښو شل کړې

دښمنان زما د خلکو دي لکونه
ورک يې ته ځمکې مخ نه په اجل کړې

توان توفيق د اتفاق کښيږدې زما قوم کې
دښمنۍ کې دښمنان زموږ کسل کړې

ته د هر سلطان پر سر باندې سلطان يې
په قدرت سره خنثی د کفر چل کړې

پاچاهۍ کې دې کمبود د کوم څيز نسته
قوم زما لره را لنډ هر اوږد مزل کړې

خپل مې هم د ناپوهيه نه پوهيږې
ته هر يو د علم پوهې پر لار مل کړې

ستا و در ته د نومير لاسونه لپه
دين اسلام مو هر مرض لره درمل کړې

متحده ايالات ، کلفورنيا