د بحران نړيواله ډله: که پر افغانستان لګېدلي بنديزونه لرې نه شي، ښايي تر يو ميليون خلک له لوږې ومري

نن ټکی اسیا پنجشنبه، ‍۱۸ لیندۍ، ۱۴۰۰ل): د بحران نړيوالې ډلې خبرداری ورکړی، که پر افغانستان لګېدلي بنديزونه پورته نه شي، نو ښايي سږ کال ژمي کې تر يو ميليون پورې خلک له لوږې او يخنۍ ومري.

د بحران نړيوالې ډلې څېړنيزې ادارې له ملګرو ملتونو او ټولو ښکېلو هېوادونو غوښتنه کړې، چې د افغانستان روان اقتصادي او بشري وضعيت ته جدي پاملرنه وکړي او د افغان ولس د ژوند ژغورلو لپاره بايد پر افغانستان لګېدلي بنديزونه پورته کړي.

دغې څېړنيزې ادارې اندېښنه ښوولې، که د افغانستان وضعيت همداسې روان وي او بنديزونه پورته نه شي، نو ښايي په لنډ وخت کې دومره خلک مړه شي، چې په تېرو شلو کلونو کې د جګړو او بمباريو له امله وژل شوي دي.

د بحران نړيوالې ډلې پر ملګرو ملتونو، امريکا، اروپايي ټولنې، او نورو هېوادونو غږ کړی، چې له اړمنو افغانانو سره بېړنۍ بشري مرستې وکړي او که وضعيت همداسې دوام وکړي، نو ښايي د يخنۍ او لوږې له امله تر يو ميليون پورې خلک خپل ژوند له لاسه ورکړي.

ملګري ملتونه هم وخت پر وخت د افغانستان پر اقتصادي او بشري وضعيت اندېښنه ښيي او له افغانانو سره د بېړنيو بشري مرستو غوښتنه کوي.

ملګري ملتونه وايي، دا به له عدالته لرې خبره وي، چې د طالبانو تر واک لاندې سيمو ته مرستې ونه رسيږي او هلته، ښوونکي، ډاکټران، امنيتي مسؤولين او نور کار کوونکي له مرستو محروم پاتې شي، خو امريکا ټينګار کوي، چې تر څو د دوی شرطونه نه وي منل شوي، تر هغو پورې له افغانستان سره مرستې نه شي کولای.

د بحران نړيواله ډله وايي، امريکا له ملګرو ملتونو سره همغږې نه ده او فکر کوي، چې دا ډول مرستې به له اسلامي امارت سره همکاري وي.

امريکا د افغانستان شاوخوا نهه نيم ميليارده ډالر پانګه کنګل کړې او ادعا کوي، که دا پيسې ازادې شي، نو اسلامي امارت ته به لويه لاسته راوړنه وي.

خو د افغانستان اسلامي امارت مسؤولين بيا ډاډمن دي، چې وضعيت به ښه شي او دومره هم د اندېښنې وړ څه نه شته، چې نړيوالو څېړنيزو مرکزونو يې په اړه ګنګوسې خپرې کړي دي.

د اسلامي امارت مرستيال وياند بلال کريمي ویلي، افغانستان تازه له جګړو را وتلی، ستونزې شته، خو تر ټولو ستره اړتيا امنيت دی، چې ټول خلک ترې برخه‌من دي او د اقتصادي ستونزو د اواري لپاره هم هڅې روانې دي.

د ښاغلي کريمي په وينا بانکونه مديريت شوي او د ګمرکاتو عوايد په شفاف ډول مرکز ته رسيږي او د کنګل شوو پيسو د بېرته خوشې کېدو لپاره هم له امريکا سره خبرې روانې دي.