کابل ته د رادار سیستم لومړۍ جوپه راورسېده

نن ټکی اسیا (یکشنبه، ۵ مرغومي، ۱۴۰۰ل): د افغانستان د ملکي هوايي چلند اداره وايي، د هوايي حریم د کنترول په خاطر یې کابل کې د رادار سیستم فعالولو اجازه ورکړې ده.

د یادې ادارې په وینا د هوايي حریم د کنترول بشپړ رادار لومړۍ جوپه کې درې پایې رادار چې له فرانسې هېواد څخه وارد شوي د کابل په نړیوال هوايي ډګر کې د ټرانسپورټ او هوايي چلند وزارت سپارل شوې دي.

په ټول هېواد کې د هوايي حریم د کنټرول په موخه د فرانسې له «ټالس» شرکت سره د ۱۱۲ ملیونه یورو په ارزښت د رادارونو تړون لاسلیک شوی او ټاکل شوې ده چې ددې تړون له مخې د ۲۰۲۳ م کال په پای ته رسېدو وړاندې په کابل، بلخ او هرات ولایتونو کې په مرحله ییزه توګه په ۱۲ سایټونو کې د رادار سیستم فعال او د هېواد هوايي حریم په بشپړه توګه کنټرول شي.

دا په داسې حال کې ده چې دوه ورځې وړاندې د قطري او ترکي شرکتونو ګډ پلاوی کابل ته راغلی او د افغانستان د هوايي چلند ادارې له مسئولینو سره د کابل په ګډون د پنځو نړیوالو هوايي ډګرونو د کنټرول او مدیریت لپاره په خبرو بوخت دي.

له افغانستانه د امریکايي ځواکونو د وتلو پرمهال په کابل نړیوال هوايي ډګر کې ولاړې الوتکې او تخنیکي وسائل د یادو ځواکونو لخوا ویجاړ کړل شول، چې ورسره یاد هوايي ډګر او د افغانستان د هوايي حریم د کنټرول سیستم غیر فعال شو.

باید وویل شي چې تردې وړاندې د افغانستان په هوايي حریم باندې په کلني ډول د ۹۵ زره عبوري الوتنو له درکه ۶۶ ملیونه ډالره د هېواد خزانې ته راتلل، چې له بهرنیو شرکتونو سره له تړون وروسته او هوايي حریم کنټرول سره دغه بهیر یوځل بیا پيل شي.