افغانستان

چین: افغانان حق لري په خپل هېواد کې په دیني او کلتوري ارزښتونو ولاړ نظام جوړ کړي

نن ټکی اسیا (شنبه، ۲۵ مرغومي، ۱۴۰۰ل): چین په افغانستان کې د خلکو د دیني او کلتوري ارزښتونو په رڼا کې نظام جوړول د افغانانو خپل حق ګڼي.

دا څرګندونې نن د شنبې په ورځ له غرمې وروسته په کابل کې د چین سفیر وانګ یو د افغانستان د کورنیو چارو وزیر خلیفه سراج الدین سره په لیدنه کې کړي او زیاته کړې یې ده چې هېواد یې د افغانستان په کورنیو چارو کې د نه لاسوهنې ترڅنګ هڅه کوي چې د نورو هېوادونو پرخلاف خپلې ټولې بشري مرستې د افغانستان اسلامي امارت له لارې ترسره کړي.

د باختر خبري آژانس د راپور له مخې په دغه لیدنه کې د چین سفیر له نړیوالو هم غوښتنه کړې چې تیرې شل کلنې تجربې ته په کتو باید په افغانانو د خپلې خوښې مفکورې د تپلو هڅه ونه کړي، ځکه افغانانو له پردیو مفکورو سره ضد لري.

نوموړي دغه راز د افغانستان د تیرو شلو کلونو د ستونزو اصلي لامل امریکا بللې او په امریکا یې غږ کړی چې باید په افغانستان کې د روان بشري ناورین مسئولیت منلو سربیره افغانانو سره مرسته وکړي او کنګل شوې شتمنۍ آزادې کړي.

د لیدنې په ترڅ کې چینايي سفیر د افغانستان د کورنیو چارو وزیر له سرپرست څخه غوښتنه کړې چې ددوحې تړون په اساس باید افغان خاوره د نورو هېوادونو پرضد ونه کارول شي.

په افغانستان کې د ټولشموله حکومت، بشري حقونو او د بیان آزادۍ په هکله د چین سفیر وانګ یو ویلي، چې امریکا پورته مسائل د بهانې په توګه کاروي او د اقتصادي بندیزونو له لارې غواړي په افغانستان کې د خپلې ماتې غچ واخلي.

د افغانستان د کورنیو چارو سرپرست وزیر خلیفه سراج الدین حقاني د چین هېواد له بشري مرستو څخه مننه کړې او د افغان حکومت په رسمیت پېژندلو کې د همکارۍ غوښتنه کړې ده.

ورته لیکنې

ګډون وکړئ
خبرتیا غوښتل د
guest
1 Comment
زړو
نویو ډیرو خوښو شویو
Inline Feedbacks
ټولې تبصرې کتل
Sayed

دا خو ښه خبره ده، خو ولس الحمد لله مسلمان دی.
ايا ښه به دا نه وي چې تاسې خو هم لږ ښه شئ او د ايغور مسلمانانو ته ازادي ورکړئ چې خپل مذهبي مراسم په خلاص مټ تر سره کړي. ولې مو په دې کمپونو کې اچولي دي؟

Back to top button
1
0
ستاسو نظر مونږ ته دقدر وړ دی، راسره شریک یې کړئx
()
x