مادیات که معنویات؟

عبدالجبار وحدت

که څومره هم د مادیاتو د رجحان لپاره هڅه وشي او یا یو څوک ارزښت ورکړي، بیا هم معنویات -معنویات دي.

منم حلالې پیسې ښه شی دي، مګر هر څه نه دي.

د ژوند مفهوم یوازې مالي او پولي بازار ندی چې فقط مالي راکړې ورکړې به پکې تر سره کېږي.

نه نه! داسې بالکل نده، دا خلک عارفانه تجاهل کوي، دلته د علمیت، تفکر، معقولیت، عقلانیت، منطق، ارزښتونو، تحلیلونو او علمي لیدونو موضوعات خورا لوړ، مهم او مطرح دي، هو پدې شرط چې معنویات وساتل او وستایل سي، موږ د اسلامي او غربي اقتصاد له سترو توپیرونو څخه یو دا توپیر یادوو چې غربي اقتصاد یوازې او یوازې مادیات/پیسې په پام کې نیسي، ارزښت ورته ورکوي او بس، مګر اسلامي اقتصاد ددې برعکس له مادیاتو سره، سره معنویات هم په پام کې لري، ارزښت ورکوي او د ژوند مهمه برخه یې بولي او مادیات پرته له معنویاتو د بې روحه ماشین په قالب کې د پیسو سره مشابه کوي.

له بده مرغه پانګوال نظام او سیستم د هر څه لپاره معیار زر بولي چې تاثیر او تاثر یې له پانګوال سیستم سره تش په نوم  کرکه کوونکو ټولنو کې خورا زیات لیدل کېږي.

درنښت