مست رودونه/ نومير

فدامحمد نومير

دا به مځکه دا اسمان دا به وي ستورې
دا د نن ورځې سختۍ به نه وي نورې

نه به لوږه، نه به تنده، بې کوري وي
نه به اه، نه به فرياد وي د برارې مورې

تورو غرو نه به ياقوت او لعل را زيږي
ځمکه شنه به زمرود کا په هر لوري

د وريځو نه به سپین الماس رالويږي
ملغلرې د اسمان نه به را اوري

دا شڼ مست رودونه هم به را مهار سي
د حيات اوبه به درومي دورې وري

وې پوښلې به بيديا په مخملونو
څومره سترګې چې کاته کا هوري دوري

شان شوکت به د افغان بيا را ژوندی سي
چې را غونډ يې امراء سي تر يو سيوري

د يتيم کونډې به يو مخ داد رسي وي
د عمر (رض) عدل جاري به وي هر لوري

افغانان به بيا شي سيال د سيالدارانو
د نومير خوب به رښتيا شي په دا توري

متحده ايالات ، کلفورنيا