افغانستان

زابل: ژوره څاه کې د لویدلي ماشوم ژغورلو هڅې لا هم روانې دي

نن ټکی اسیا (پنجشنبه، ۲۸ سلواغه، ۱۴۰۰ل): د افغانستان په سویل ولایت زابل کې یو کوچنی ماشوم په ژوره برمې څاه کې لویدلی چې له تېرو دوه ورځو راهیسې یې د ژغورلو هڅې روانې دي.

د افغانستان اسلامي امارت ویاند او د اطلاعاتو او کلتور وزارت مرستیال ذبیح الله مجاهد ویلي چې د ماشوم د ژغورنې هڅې روانې دي، روغتیایي حالت یې ښه دی، او د ژوندي ساتلو لپاره اکسیجن او خوراکي توکي ورښکته شوې دي.

په ټولنیزو رسنیو کې خپرې شوې ویدیوګانې او عکسونه ښيي چې د درنو ماشینونو په واسطه د ماشوم د ژغورلو پراخې هڅې روانې دي او د څاه په لور په داسې حال کې ژوره کنده ویستل کیږي چې ماشوم ته زیان هم ونه رسیږي.

د منصور حافظ په نوم د يو ساختماني شرکت مشر محمد طاهر ثاقب چهارشنبه اطلاعات روز ته ویلي چې تېره ورځ يو ماشوم د اوبو برمې ته لويدلی دی، چې د بيرته را ايستلو لپاره يې لاهم هڅې روانې دي.

د نوموړي په وينا، دغه ماشوم لا هم ژوندی دی او روغتیايي وضعیت يې هم د ډاډ وړ ښودل شوی دی، هغه زیاتوي، «مونږ د ماشوم د را ايستلو لپاره په يو تونل کار پيل کړی، چې تر ډېره بريالي شوي يو، خو په مخ کې يوه ډبره را پيدا شوې، چې زمونږ د کار مخه يې نيولې ده.».

بل لوري ته د ویاند مرستیال احمد الله وثیق وایي چې د پېښې ځای ته د زابل والي او نور مسئولین هم رسېدلي چې ویستونکو ته یې سپارښتنې کړې دي.

دا پېښه دوه ورځې وړاندې د زابل ولایت مرکز قلات ښار جلدک سیمي اړوند شوخک کلي کې رامنځته شوه چې یو ماشوم ژورې او تنګې د اوبو برمې څاه ته لویدلی دی.

له سیمې ځايي خبریالان وایي چې دغه ماشوم شپږ کاله عمر لري او په ۳۵ متره ژوره څاه کې لویدلی، خو د څاه تنګوالي له کبله ماشوم په ۱۷ مترۍ کې بند پاتې دی.

دوه اونۍ وړاندې په مراکش هېواد کې ورته پېښه رامنځته شوه چې له څلورو ورځو راهیسې په یوه څاه کې د لویدلي ماشوم هڅې روانې وې خو بالاخره مړ راوویستل شو.

د یادونې ده چې تېر کال اپریل میاشت کې د هلمند ولایت په سنګین ولسوالۍ کې هم یو ماشوم هغه مهال مړ راوویستل شو چې له دریو ورځو راهیسې یې د راویستلو هڅې روانې وې.

ورته لیکنې

ګډون وکړئ
خبرتیا غوښتل د
guest

1 Comment
زړو
نویو ډیرو خوښو شویو
Inline Feedbacks
ټولې تبصرې کتل
عبدالله

اسلام عليکم

که ماشوم په کويي کي لاس او پښي خوځولي شي او په خبره يي لږ سر خلاصيږي، نو اسانه لار يي دا هم کيدلي شي چي د پراشوټ دکمربند په څير يو کمر بند دپړي په واسطه ورکښته شي او هلته هغه ماشوم خپلي پښي او لاسونه پکي ور دننه کړي او را وويستل شي

Back to top button
1
0
ستاسو نظر مونږ ته دقدر وړ دی، راسره شریک یې کړئx