افغان حکومت پېښور کې پر جومات چاودنه غندلې

نن ټکی اسیا (شنبه، ۱۴ کب، ۱۴۰۰ل): د کوزې پښتونخوا پېښور ښار په قصه خوانۍ سیمه کې پر جومات د جمعې لمانځه پرمهال چاودنه وشوه چې له مخې یې نږدې شپته لمونځ کونکي وژل شوي او شاوخوا ۲۰۰ نور ټپيان دي.

د افغان حکومت او د اطلاعاتو او فرهنګ وزارت ویاند ذبیح الله مجاهد پېښور کې پر لمونځ کونکو چاودنه غندلې او په وینا یې پر ملکي خلکو او عبادت کونکو برید هیڅ د توجیه وړ نه دی.

هغه په خپله ټویټر پاڼه لیکلي، «موږ د پیښور ښار په یوه مسجد کې چاودنه غندو، په ملکي خلکو او عبادت کونکو برید هیڅ توجیه نه لري. په پیښه کې له ټولو متضررینو سره خپله ژوره خواخوږي ښیو».

خواخوږي:
موږ د پاکستان پیښور کې په یوه مسجد کې چاودنه غندو، په ملکي خلکو او عبادت کونکو برید هیڅ توجیه نه لري.
په پیښه کې له ټولو متضررینو سره خپله ژوره خواخوږي ښیو.

— Zabihullah (..ذبـــــیح الله م ) (@Zabehulah_M33) March 4, 2022

بل لوري ته په اسلام اباد کې د افغانستان سفارت هم وایي چې د پېښور پېښه په کلکو ټکو غندي او قربانیانو له کورنیو سره په دغه غم کې ځان شریک بولي.

سفارت پر خپله فیسبوکپاڼه لیکلي: «اسلام آباد کې افغان سفارت هم د پېښور ښار د قصه خوانۍ په سیمه کې په یو مسجد کې پر عبادت کوونکو ، ملکي وګړو خونړی برید په کلکو ټکو غندي. افغان سفارت د پېښې د قربانیانو له کورنیو سره په دې غم کې ځان شریک بولي، غمجنو کورنیو ته د خواخوږۍ مراتب وړاندې کوي او ټپیانو ته د بېړنۍ روغتیا هیله څرګندوي».

د یادونې ده چې د پېښور په ګڼه ګوڼې قصه خوانۍ بازار په سالدار کوڅه کې د شیعه ګانو پر جومات د جمعې لمانځه پرمهال چاودنه وشوه چې د وروستي راپورونو له مخې په کې لږ تر لږه 250 کسانو ته مرګ ژوبله اوښتې ده.