ادبي لیکني

رښتيا چې ته الله یې

عبدالسميع سعيد

د کتاب څو پاڼې مې چې ولوستې موضوع یې خوند راکړ، د رب سره د روغې جوړې او مناجات تړون وو، د خالق په قدرتونو، جمالونو او کمالونو بحث شوی، پيل د رب په صمديت صفت شوی، دا روښانه کوي چې موږ د يو داسې بې نیازه خدای مخلوق يو چې ټول هغه ته اړ او محتاج دي، په دې دې پوهوي چې د هغه ذات خوښه نه وي هېڅوک تاته ضرر نشي رسولای نو بايد وېره او ترهه يواځې له هغه څخه ولرې.

بيا درته د رب د حفاظت غېږه کې پناه درکوي، ډاډه کوي دي چې هغه ستا په هر حالت کې ساتونکی دی، په ډېرو معقولو دلائلو روښانوي چې هغه ذات هېڅکله خپل بنده د حفاظت له نظره نه غورځوي؛ بلکې د هغه سره یې محافظې ملائکې ګومارلي دي.

بل ځای در يادوي چې ته د يو داسې خالق بنده یې چې هغه په خپلو بندګانو نرمي کوونکی، باریک بين او مهربانه دی، او هغه د داسې پټو مهربانيو څښتن دی چې له خبرتیا پرته یې درباندې لوروي؛ هغه کله نا کله ستا لپاره په يوه مصيبت کې پټ او پوښل شوي رازونه لري.

يو ځای د رب هغه صفت ته اشاره شوې چې شفاء بلل کېږي، دا داسې صفت دی چې له ورايه پکې د رب مهرباني نغښتې ښکاري، هغه داسې ذات دی چې تاته له سبب پرته شفاء درکوي.

بل ځای په ډېره ماهرانه توګه دا روښانوي چې په هر حال او ځای کې رب ستا کارونه جوړوي، خوبونه او خيالونه دې په حقيقت بدلوي، تر لوړو پوړيو دې رسوي.

بيا د شکور ذات لطف او کرم ستا مخې ته ږدي او وايي چې د إلٰهي ذات لطف په حساب کې نه ځائېږي.
بيا دې ډاډه کوي چې رب د خپل جباريت او هدايت صفتونو په برکت تا سمې لارې ته سیخ کوي.

هغه لارې چارې هم درښيي چې له مخې یې درته ټول ګناهونه ورژوي، دا در زده کوي چې د غفور ذات در ته څه وړ ورشې؟

په پای کې دې په غوږ وهي چې بايد په ياد ولرې چې ته د قريب ذات د څارنې لاندې یې.
په ټوله کې ياد کتاب د الله تعالی لوري ته په نوي او ښه سفر کولو ليکل شوی ، که غواړی چې ژوند کې مو مثبت بدلون راشي ياد کتاب ولولئ.

د سجاد صاحب ژباړه دې روانه او افغان طبيب خپرندويه ټولنه دې بې رنګه نشي.
عبدالسميع سعيد

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx