تا سترګې کړې بدلې د پرديو په رقم/ بهسودوال

پروېز بهسودوال

تا سترګې کړې بدلې د پرديو په رقم
خبرې مې شوې خوله کې د سلګيو په رقم

زلمي د برباديو د وحشت د بڼ زمريان
انجونې دي د سولې د مرغيو په رقم

ليده دې يو عذاب او نه ليده دې بل عذاب
دا برګې برګې سترګې د مريو په رقم

د ښار د خاموشۍکيسې بېخي ادم خورې
په ښار کې ځناور دي د سړيو په رقم

په تا پورې تړلې هيلې سيند ته غورځووم
تمثيل کوومه ستا د برباديو په رقم

په وخت د پاچاهۍ ضرورت مړ کړې بهسودواله
کولى دې شو ژوند د لېونيو په رقم

پرویز بهسودوال