د افغانستان هوايي ډګرونو تنظیم چارې عربي اماراتو ته وسپارل شوې

نن ټکی اسیا (سه شنبه، ۳ غبرګولی،۱۴۰۱ل): افغان حکومت د عربي اماراتو له یوه شرکت سره د افغانستان څلور نړیوال هوايي ډګرونو د تنظیم په اړه هوکړه د عربي اماراتو له یوه شرکت سره لاسلیک کړه.

دغه هوکړه د  ریاست‌الوزراء د اقتصادي مرستیال ملا عبدالغني برادر اخوند په حضور کې د ترانسپورټ او هوايي چلند وزارت او د متحده عربي اماراتو د GAAC/G42 کمپنۍ تر منځ لاسلیک شوه.

د هوکړې له مخې به د ګاک کمپنۍ د کابل، کندهار، مزارشریف او هرات په هوايي ډګرونو کې الوتکو ته د پروازونو پر مهال  ځمکني خدمات چمتو کوي.

د ریاست الوزرا اقتصادي مرستیال ملا عبدالغني برادر اخوند د دغه تړون د لاسلیک کېدو پر مهال وویل، اسلامي امارت د هېواد د اقتصادي پياوړتیا لپاره پوره هڅه کوي، چې له دغه تړون سره به ټولې نړیوالې هوايي کمپنۍ د امن په فضا کې بېرته افغانستان ته پروازونه پيل او د سوداګرۍ کچه به ورسره زیاته شي.

د یادونې وړ ده چې قطر، ترکیې او عربي اماراتو له یوې اوږدې مودې راهیسې له افغان حکومت سره د افغانستان د نړیوالو هوايي ډګرونو د تنظیم په موخه مذاکرات کول.

د څارونکو په وینا له افغان حکومت سره د کابل هوايي ډګر د چلولو په اړه مذاکرات ښيي چې سیمه‌ییز قدرتونه په افغانستان کې دلچسپي لري او د همدې کبله د پروژو ترلاسه کولو لپاره رقابت کوي.