دیني، سیرت او تاریخ

په قرآن کې د( فَاسْتَعِذْ بِاللَّهِ )کلمه

لیکوال: احمد الله عاطفي

قال الله تبارک وتعالی:وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۚ إِنَّهُ سَمِيعٌ عَلِيمٌ.( الاعراف: ۲۰۰)

ژباړه:اوکه دشیطان کومه وسوسه دي وسوسه کړي نو الله ته پناه یوسه، بې شکه چي هغه ښه پوه اوریدونکی دی.

قال الله تبارک وتعالی: فَإِذَا قَرَأْتَ الْقُرْآنَ فَاسْتَعِذْ بِاللَّهِ مِنَ الشَّيْطَانِ الرَّجِيمِ.(النحل: ۹۸)

ژباړه: نو کله چي قرآن لولې الله ته درټل شوي شیطان پناه یوسه.

قال الله تبارک وتعالی: وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْعَلِيمُ.(فصلت :۳۶)

ژباړه:اوکه دشیطان له لوري کومه وسوسه او هڅونه درورسیږي نوپه الله سره پناه غواړه، یقیناً هغه پوه اوریدونکی دی.

قال الله تبارک وتعالی:إِنَّ الَّذِينَ يُجَادِلُونَ فِي آيَاتِ اللَّهِ بِغَيْرِ سُلْطَانٍ أَتَاهُمْ ۙ إِن فِي صُدُورِهِمْ إِلَّا كِبْرٌ مَّا هُم بِبَالِغِيهِ ۚ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْبَصِيرُ.(غافر:۵۶)

ژباړه:یقیناً هغه چي دالله دآیتونو په اړه مجادله کوي پرته له دې چي کوم دلیل ورکړی شوی وي؛ په سینو کي ئې داسي کبر دی چي هیڅکله ور رسیدلی نشي، نو په الله سره پناه غواړه، یقیناً چي هغه لیدونکی اوریدونکی دی.

(فَاسْتَعِذْ بِاللَّهِ:په الله سره پناه غواړه)

الله سبحانه وتعالی په ځانګړي توګه خپل استازي سیدنا حضرت رسول اکرم(صل الله علیه وسلم) او په مجموع کې دحق لاري لارویانو ته ډاډ ورکوي چې دمخالفینو سره دخپلو ناروا ادعاو لپاره هیڅ دلیل نشته، یواځي دوی غولونکي کبر او غرور مجادلي ته هڅولي، چې هیڅکله به بریالي نه شي.

د دغو کبرجنو دمخالفت هیڅ پرواه مه کوه، د دوی دمخالفت په وړاندي الله سبحانه وتعالی ته پناه یوسئ.

په قرآن کې د(أُعِيذُهَا)کلمه

قال الله تبارک وتعالی: فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنثَىٰ وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالْأُنثَىٰ ۖ وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ. ( ال عمران: ۳۶)

ژباړه:نوکله چي ئې وزیږاوو،وئې ویل:اې زما ربه! ماخو نجلۍ وزیږوله!اوالله ښه پوهیږي چي څه ئې زیږولې، او نارینه خو دښځي په څیر نه وي! او ما هغه مریم ونوموله او زه دا او اولاد ئې له رټل شوي شیطان ستا په پناه کي درکوم.

د(اُعیذ) کلمه په قرآنکریم کې یوځل ذکر شوی، هغه هم د عمران دښځي د دعا په اړوند.

دا حکایت د عمران دښځي(حنه بنت فاقوذ)دی چې خپل د ګیډي اولاد ئې په دې نیت نذرکړی و چې دا به د بیت المقدس(سلیماني هیکل) خدمت کوي،کله ئې چې وزیږوله هلک نه بلکه نجلۍ وه.

که په بشپړ حکایت ځان پوهول غواړی؟ تفسیر ته مراجعه وکړئ.

په قرآن کې د( عُذْتُ بِرَبِّي ) کلمه

قال الله تبارک وتعالی: وَ قالَ مُوسى إِنِّي عُذْتُ بِرَبِّي وَ رَبِّكُمْ مِنْ كُلِّ مُتَكَبِّرٍ لا يُؤْمِنُ بِيَوْمِ الْحِسابِ (غافر:۲۷)

ژباړه: او موسی وویل: زه خپل رب او ستاسو رب ته له هر هغه کبرجن پناه وړم چي دحساب په ورځي ایمان نه لري.

فرعون ته اندیښنه پیدا شوه که د حضرت موسی(علیه السلام) مخه ونه نیول شي د ده مطلقې واکمنۍته خطر پیښیږي.

خپل امرین ئې را وغوښتل او دهغو سره ئې په مشوره کې وويل: موسی(علیه السلام) ستاسو دپلرونو دین بدلوي ،کوم چې تاسو او ستاسو پلرونو له کلونو را پدیخوا منلې او هغه رسم اوطریقه مو خپله کړې دهو او دویم دا چې غواړي له قبطیانو واکمني واخلي او بني اسرایل واکمن کړي نو په همدې دلایلو باید ووژل شي، چې د خطر مخه ونیول شي.

همدا خبر چې حضرت سیدنا موسی(علیه اسلام) ته ورسید خپل قوم ته ئې وفرمایل: یواځي فرعون خو پریږده که د دنیا ټول منکرین او متکبرین زما خلاف ودریږي زه له هغو ویره نه لرم اونه ماته څه تاوان رسولی شي، زکه زما په خپل رب (عزوجل) تکیه دی هغه زما ساتونکی او نګبان دی، ما خپل ځان یواځي دهغه په آمان کې ورکړی.

قال الله تبارک وتعالی:وَإِنِّي عُذْتُ بِرَبِّي وَرَبِّكُمْ أَن تَرْجُمُونِ.( دخان :۲۰)

ژباړه:او زه خپل رب او ستاسو رب ته له دې پناه وړم چي سنګسار مي کړئ.

سیدنا حضرت موسی (علیه السلا) د فرعون او فرعونیانو نه غوښتنه وکړه چې بني اسرایل ازاد کړي چې له ماسره هر چیرته تګ غواړو لاړ شو،تاسو دالله (عزوجل) ازاد پیدا کړي بندګان غلامان مه جوړوئ.

فرعون او ډله ئې کواښ وکړ چې موږ موسی (علیه السلام) سنګساروو.

په ځواب کې حضرت موسی(علیه السلا) وفرمایل:زه له تاسو ویره نه لرم ، ما خپل ځان الله(عز وجل) ته سپارلی هغه زما ساتنه کوي.

که ایمان نه راوړئ زمانه په سنګ شئ، زما د دعوت مخه نه شئ تمولی.

دویم تفسیر دادی چې فرعونیانو په موسی (علیه السلام) تور پورې کوو چې ساحر،کوډ ګر او دروغ ویونکی دی.

د دوی په ځواب کې موسی(علیه السلام) همدا پورته کلمات وویل چې وړاندي تیر شول.

دعذت کلمه چې الله سبحانه وتعالی ته پناه وړل دي په قرآنکریم کې دوه ځایه دخبر په توګه ذکر شوي، دواړه ځایه دسیدنا حضرت موسی (علیه السلام) په اړوند.

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx