ورزش

عزيز الله فضلي له خوشې کېدو وروسته؛ بندي نه بلکې په ارګ کې ميلمه وم

نن ټکی اسيا (دوشنبه، ۲۲ چنګاښ، ۱۴۰۱ل: د کرکټ بورډ پخوانی رئيس عزيز الله فضلي وايي چې له تېرو څو ورځو راهيسې بندي نه و، بلکې په ارګ کې د رئيس الوزراء له لوري د‌ ميلمه په حيث پاتې شوی و.

عزيز الله فضلي تېره اونۍ پر کرکټ بورډ د څو وسله والو کسانو سره يوځای ورغلی و، خو د ګاردانو له لوري د اجازې نه ورکولو پرمهال يې هوايي ډزې وکړې او بېرته ستون شو، چې سمدستي د رئيس الوزراء له لوري ارګ ته وغوښتل شو.

د افغانستان کرکټ بورډ پخواني متنازع رئيس په دې تړاو پر خپله فيسبوکپاڼه يوه ليکنه خپره کړې چې وايي، د کرکټ بورډ مشرتابه له لوري د مشورو او سپارښتنو لپاره کرکټ بورډ ته غوښتل شوی و، خو وروسته داخل ته اجازه ورنکړل شوه او ستون شو.

که څه هم هغه زياتوي چې په ويديو کې داسې کومه د امنيتي پېښې ستونزه نه ليدل کيږي، خو د کرکټ بورډ سرچينې وايي چې د اجازې نه ترلاسه کېدو سره نوموړي د کرکټ بورډ مخې ته هوايي ډزې کړې دي.

د جعلي مکتوب په پار فضلي په تکراري ډول ليکلي چې دده سره د رياست مقررۍ جعلي مکتوب نه، بلکې د امير المؤمنين اصلي مکتوب دی، چې هغه مهال د رئيس الوزراء سره هم شريک شوی دی.

هغه ليکلي چې ارګ کې له څو ورځو راهيسې د رئيس الوزراء په امر پاتې شوی، او د يوه بندي په حيث نه بلکې د يوه ميلمه په توګه برخورد ورسره شوی دی.

تېر ته په کتلو عزيز الله فضلي په خپل وخت د کرکټ بورډ يو متنازع مشر پاتې شوی دی. په ۲۰۱۹م نړيوال جام کې د نوموړي له رئيس کېدو وروسته کرکټ بورډ اداره او د لوبغاړو ترمنځ اختلافات زيات او آن نړيوالو ته څرګند شول، چې په پايله کې تکړه افغان لوبډله له بریا څخه محرومه شوه.

د اسلامي امارت له راتلو وروسته نوموړي ځان د فرحان يوسفزي په نه شتون د کرکټ بورډ سرپرست رئيس معرفي کړ، چې وروسته په خپله پريکړه عمومي رئيس شو.

د کرکټ بورډ اجرائيه رئيس حامد شينواري له ګوښه کېدو او نصيب خان له ټاکل کېدو وروسته د عزيز الله فضلي پرځای ميرويس اشرف د بورډ رئيس په توګه وټاکل شو، چې ګڼ شمېر لوبغاړو او کرکټ مينوالو يې هرکلی وکړ، او د افغانستان کرکټ ته يې د پرمختګ نوې هيلې ورکړې.

د کرکټ بورډ ځينو موثقو سرچینو په حواله، عزيز الله فضلي د اسلامي امارت د واکمنۍ پرمهال د کرکټ نړيوالې شورا ته داسې ايميلونه هم کړي چې ګواکې «اوسنۍ اداره د يوې ډلې مربوط ده او په افغانستان کې کرکټ د تباهۍ مخې ته بيايي چې تاسې يې باید مخنيوی وکړئ».

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx