شعـــــرونه

آزادۍ!!!/ ثاقب خپلواک

ثاقب خپلواک

آزادۍ : د سندریز حسن مسکا یې
آزادۍ : فطري اعجاز د اریانا یې
آزادۍ : له ماهیت دې ښکلا څاڅي
آزادۍ : د ښایستونو مسیحا یې
آزادۍ : د ښکلاګانو په تابلو کې
آزادۍ : تمثیل د مینې د حرا یې
آزادۍ : د غرور لمونځ مسته ریا یې
آزادۍ : زموږ د هېواد آبي ښکلا یې

آزادۍ : میرویس زموږ ملي ایډیال دی
آزادۍ : د ګرګین کِبر پر زوال دی
آزادۍ : ژوند یې خلوت کې د اقطابو
آزادۍ : عمر د دې عصر ابدال دی
آزادۍ : پړ کړل محمود اصفهانونه
آزادۍ : رام پاني پت زموږ له جلال دی
آزادۍ : د رنګېنو رنګینه ساه یې
آزادۍ : زموږ د ژوندون اب هوا یې

آزادۍ : څومره شیرینه فلسفه یې
آزادۍ : د عشق رنګینه سجده یې
آزادۍ : موږ بغاوت له تیارو کړی
آزادۍ : ته یوه حسینه پلوشه یې
آزادۍ : د کائناتو په تعمیر کې
آزادۍ : د راز زرینه سلسله یې
آزادۍ : د خپلواکۍ ناز او ادا یې
آزادۍ : ته د ښایست په رنګ بسیا یې

آزادۍ : د ساز پاڅون خوږه نغمه یې
آزادۍ : د خاموش فکر زمزمه یې
آزادۍ : چې ستا پر حسن یې ایمان ؤ
آزادۍ : د رب د مینې کرشمه یې
آزادۍ : نرګس،غاټول درنه لوګۍ شو
آزادۍ : د سپین ګلاب پسته وږمه یې
آزادۍ : د مست اهنګ مسته نڅا یې
آزادۍ : ترنګ د رباب ډهول د غزا یې

آزادۍ : د پیغمبر یوه معجزه یې
آزادۍ : د ریاضت بله ډیوه یې
آزادۍ : موږ له حسرت حیرت ته رسوو
آزادۍ : د کرامت رڼه جلوه یې
آزادۍ : پرې د تیارو طواف حرام دی
آزادۍ : ته د رڼا د نور کعبه یې
آزادۍ : د وجودي مینې اروا یې
آزادۍ : زموږ د تخلیق په نور زیبا یې

آزادۍ : ستا پر ښکلا زموږ ایمان دی
آزادۍ : په تقدس کې دې عرفان دی
آزادۍ : د زلمیتوب سپین توغ رپیږي
آزادۍ : د پیغلتوب پوره ارمان دی
آزادۍ : د نرګسیت کور دلته وران دی
آزادۍ : (خپلواک) ودان افغانستان دی
آزادۍ : تیاره قامت کې د بودا یې
آزادۍ : زموږ د تهذیب د طور رڼا یې

ثاقب خپلواک

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx