په کابل هوايي ډګر کې د قطر تخنیکي ماموریت پای ته ورسید

نن ټکی اسیا (شنبه، ۲تله، ۱۴۰۱ل): په کابل کې د قطر سفارت د یوې خبرپاڼې په خپرولو سره اعلان وکړ چې په کابل کې ددوی تخنیکي ټیمي خپل فعالیتونه په بریا سره پای ته ورسول.

د اعلامیې سره سم د قطر تخنیکي ټیم په نړیوالو سټینډرونو سم د کابل میدان یو ځل بیا فعاله کړی وو، چې له امله یې افغانستان ولس ته بشري او انکشافي مرستې ورسیدې او همداسي د هوايي ډګر له لاري د مسافرو تګ او راتګ بیا پيل شوی وو.

د قطر سفارت زیاته کړې چې هیواد به یې د افغان ورور ولس تر څنګ هر وخت ولاړ وي، په ځانګړي ډول په سختو شیبو کې.

باید وویل شي چې پر کابل د افغانستان اسلامي امارت تر فتحې او بیا د امریکایانو د وتلو وروسته د کابل هوايي ډګر په ویجاړ حالت کې پرېښودل شوی وو او ټول سیسټمونه یې د امریکا لخوا لمنځه وړل شوي وو، چې بیا د قطر په تخنیکي مرسته د کابل هوايي ډګر فعاله شو.

د یادونې ده چې قطر او ترکیه په ګډه غوښتل چې د کابل هوايي ډګر د ادارې او پرمخ وړلو قرارداد د افغانستان د نوي حکومت سره امضا کړي خو تر څو ځله مذاکراتو وروسته دغه پروسه ناکامه او بالاخیره د متحده عرب اماراتو د مختلفو کمپنیو سره قراردادونه رسما لاسلیک شول او تمه ده چې د قطري تخنیکي ټیم وروسته به سمدستي یاد شرکتونه په کابل هوايي ډګر کې تخنیکي چارې په غاړه اخلي.

د افغانستان د هوايي چلند او ترانسپورټ وزارت یوه مسؤول نن ټکی اسیا ته وویل چې له دې وروسته به د افغانستان هوايي ډګرونه د مرستو پر اساس نه بلکې د قراردادونو لمخې اداره کیږي.