نظــر

د افغان فلم تازه فلم او څو خبرې….!

خ احمدزی

د افغان فلم په نامه اداره/ریاست   په  ١٣٤٧لمريزکال، د افغانستان د وخت باچا محمد ظاهرشاه د حکومت په دوره کې په کار پیل وکړ.

افغان فلم  د خپل فعاليت  د تاريخ په اوږدو کې زيات هنري او مستند فلمونه توليد کړي دي او د افغانستان  د ملي سينما سبمول بلل کېږي.
ظاهراً یې موخه د افغاني فلم په جوړښت کې د اړینو ګامونو اخیستل وه، څو په دې توګه د هیواد تلویزیونونه د ترکي، هندي، امریکایي او نورو هیوادونو د جوړو شویو فلمونو له دوبلې او ترجمې خلاص او په کور دننه معیاري، جلبوونکي او بوختوونکي د پام وړ فلمونه جوړ او نندارې ته وړاندې کړي.
دغې ادارې ته په تیره شل کلنه دوره کې له دې امله دومره پاملرنه ونه شوه، چې تر ډیره د حکومت+امریکایي تمویلګرو یې، تمرکز د پرمختللو هیوادونو په جوړو شویو فاحشو سریالونو ورټول وه او د لویدیځوالو هڅه داوه، څو د انځوریزو رسنیو په مټ په افغان متدین ولس کې د دیموکراسي او فحاشي تخم وشیندي.

د مختلفو هیوادونو جوړ شوي مبتذل سریالونه په لوړ قیمت دوبله او وژباړل شول او خلکو ته د هغوی په کورونو کې د تلویزیونونو له لارې وښوودل شول.
هڅه وشوه د ستاره افغان په نامه برنامې هم په پراخه کچه سپانسر شي، څو په مټ یې نجونو او ځوانانو د خپلو هوسونو د اشباع آسانه او ارزانه لار موندلې وي.
د جمهوریت په وروستیو کې د افغان فلم ریاست ته هم څه کمه توجه وشوه، د صحرا کریمي په نامه یوه ممثله یې د یاد ریاست مشره وټاکله او د عایشې او مریم په نامه یې د یوه فلم د جوړیدو هڅه هم وکړه..
داچې د اطلاعاتو فرهنګ وزارت ته په تیره اداره کې د پام وړ توجه نه کیده او یاد وزارت هم له مهمو عایداتي منابعو لکه: ملي تلویزیون، مطبعه عامه او افغانتور څخه بې برخې شوی وه او یاد عایداتي ځایونه ترې یا مستقل او یا هم د مالیې وزارت ترچتر لاندې، چې د ډاکټر غني په پچه رسیدلی وه، انتقال شول؛ همدا لامل وه چې دغه وزارت کارونه هم ټکني شوي وه.
تیرکال تر ستر او مثبت تحول وروسته، یوځل بیا د همغې «افغان فلم» ادارې دروازې پرانیستل شوې او پخوانی کاري پرسونل یې ورته بیرته راوغوښتل شو.
دادی تیره ورځ یې د بګرام زندان په نامه د خپلو هڅو یوه بیلګه هم نندارې ته وړاندې او خلکو ته یې د یادې وحشیانه بندخونې پټ رازونه افشاء کړل.

دلته د فلم پر جوړښت څو خبرې کوو:

داچې یاد فلم د تیرې ادارې تر سقوط وروسته، په خپل ډول کې لومړنی ستر فلم دی، لازمه ده چې د ټول زیار ایستونکي پرسونل تقدیر او ستاینه یې وشي.

فلم کې څو نیمګړتیاوې هم شته؛ د بیلګې په توګه، فلم سر تر پایه د څلورو کسانو په کیسو او خبرو ورټول دی، چې اړینه وه باید هغه افغانان چې په همدې زندان کې یې دندې درلودې او دا مهال په کوردننه میشت دي، د هغو څرګندونو او اعترافاتو ته هم په کې ځای ورکړل شوی وای.

د فلم ټوله ژباړه په انګلیسي ژبه شوې، چې یو ښه کار دی، خو د ژباړې سایز دومره کوچنی دی، چې حتیٰ لوستل یې هم ستونزمن دي..

فلم کې مناسبه وه، چې د ویناوالو د ویناوو پرمهال، د بندیانو د ځورونې مختلفې صحنې هم اوبدل شوې وای، که له تیرې ادارې په پاتې هارډیسکونو او کمپیوترونو کې نه موندل کیدې، باید له انترنت څخه یې د را اخیستنې زیار ایستل شوی وای، په دې سره فلم به لا د توجه وړ ګرځیدلی وای..
د فلم په پای کې یواځې یو کس د ملاقات کوونکي په نوم را ښکاره شوی؛ باید زیار ایستل شوی وای، چې د ماشومانو او حتا د امکان تر حده د باحجابه میرمنو د سترګو لیدلی حال هم انځور شوی وای.
د فلم محتوا یو داستان دی، چې مختلف کسان یې بشپړوي، خو د داستان پرمهال مختلف مزاحیه خبرې ددې وړ نه وې، چې خپرې شي؛ ځکه دا ډول خبرې که څه هم د پام وړ ترخه خاطره بیانوي، خو مخالفین ترې ناوړه تبلیغاتي استفاده کوي.

په پای کې د یادې ادارې د لا ښو نوښتیزو ګامونو په پار یو څو وړاندیزونه کوم:

۱_د دې لپاره چې د هیواد تلویزیونونو ته مو بوختوونکي پروګرامونه برابر او د هغوی هغه تشه، چې تر پرونه یې له د نورو هیوادونو له مبتذلو سریالونو ډکه کړې وه، خالي نه وي پرې ایښې؛ اړتیا ده څو د اطلاعاتو فرهنګ وزارت یاد ریاست ته بشپړه توجه وکړي.
داچې د حکومت مالي سیستم له بانکي سختیو سره مل دی، نو لږ تر لږه دې یاد ریاست ته ځانګړی نغد فنډ بیل شي او یادې هم په مالي او اداري سییستم کې لکه د ملي تلویزیون په څیر «مستقل» شي.

۲_ د افغان فلم اداره باید له ځانه سره یواځې مسلکي او په کارپوه خلک وګماري، څو یې جوړ شوي فلمونه نه یواځې د په کور دننه میډیا توجه جلب کړي، بلکې په بهر کې هم ځانته بازار پیدا کړي.

۳_داچې هیواد مو د لسیزو جګړو ځپلی، هره دښته او غر یې تاریخي درسونه لري او هر وګړي یې د ناویلو خبرو داستانونه له ځانه سره ساتلي؛ باید د یادې ادارې د پرسونل لپاره د هیواد هرې سیمې ته د تګ په موخه د اړین ترانسپورت زمینه برابره شي، څو په دې توګه له هغو حقایقو پرده راپورته او نړیوالو ته څرګند شي، چې تر دې مهاله ترې د تش په نامه آزادو رسنیزو بنسټونو په نوم وابسته بانډونو ویره درلوده.

۴_ ددې لپاره چې یاده اداره لا هم پر پښو ودریږي ، ډیر تمرکز دې پر کیفیت وکړل شي، په مختلفو برخو کې دې داسې معیاري فلمونه جوړ شي، چې د خپلې ادارې لپاره د عواید په یوه ښه منبع هم بدل شي.

۵_یاده اداره باید د افغانانو داصیل فرهنګ، ریښتیني با شهامته تاریخ او سپیڅلو عقایدو په رڼا کې وخت پر وخت داسې څه اختراع کړي، چې. له یوې خوا مو نړیوالو ته خپل تاریخي او ملي هویت په ډاګه کړی وي، له بل لوري مو په ټولنیزو رسنیو کې ځوانان د بداخلاقیو له ګردابه را بهر او په یوه سپیڅلې ملي او عقیدوي روحیه مو روزلي وي.

د افغان فلم د لا بریاوو په هیله

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx