شعـــــرونه
هر چا ته رسېدلی دی فیضان د مصطفی
راشد کامران
هر چا ته رسېدلی دی فیضان د مصطفی
ټول جن او بشر لاندې تر احسان د مصطفی
شاهان د زمانې يې غلامان د غلامانو
مخدوم د کائنات دي خادمان د مصطفی
طائفه د محبوب د وینو څاڅکي دې په یاد دي
اُحده! درنه هېر نه شي دندان د مصطفی
حمزه نه اندامونه، له جعفر پرې وو لاسونه
نیزو باندې پېیلي وو لمسیان د مصطفی
فاتح د هر میدان وو، څوک په تمه د غفران وو
ساتلي چا نوکان وو، چا ویښتان د مصطفی
تر اوسه پیروان لا د صُفې لري امت
تر اوسه لا سرشاره دی کاروان د مصطفی
دوزخ کرا بسوزد ګر بولهب نه باشد
حساب په اهلِ بیتو کې سلمان د مصطفی
مصداق د ” رفعنا لک ذکرک” يې په ځلا دی
تفسیر یې د اخلاقو دی قرآن د مصطفی
بعد از خدا بزرګ توئی قصه مختصر
موږ چیرته او بیا چیرې عظیم شان د مصطفی
راشده نور خو نشته عملونه دفترونه
اسره ور وړمه خدای ته ثقلان د مصطفی
