کابل ښاروالۍ: د قرغې بند به په یوه غوره تفریحي او زرغونه سیمې بدل شي

نن ټکی اسیا (چهارشنبه، ۷ مرغومی، ۱۴۰۱ل): د کابل ښاروالۍ د زرغونتیا ریاست له لوري د قرغې بند په لوړو غونډیو چې څه موده وړاندې د اوبو د یوې زېرمې او د ونو د خړوب په سېسټم کار پیل شوی وو، لاهم روان دی.

د کابل ښاروالۍ د زرغونتیا رئیس له باختر آژانس سره په خبرو کې وویل، چې د یادې سیمې د پراختیا لپاره په وروستیو کې د ۲.۵ میلیونه لېټره اوبه ځایوونکې زېرمه جوړه شوې ده.

اوس مهال د ۳۵۰۰ متره په اوږدوالي د خړوب سېسټم د پیپ تېرولو کار روان دی، چې د اوبو له دې زېرمې به د ۴۰ نلونو له لارې ۴۵۰ زره متر مربع ځمکه او ۵۵ زره ونې خړوبې کېږي.

د هغه په خبره، د اوبو دا زېرمه د قرغې بند په یوه لوړه غونډۍ جوړه شوې ده، چې د واټر پمپ په وسیله يې اوبه پورته کېږي او وروسته په معیاري توګه ورڅېرمه سیمې خړوبوي.

د زرغونتیا ریاست د رئیس په وینا دوی پلان لري، چې د نیالګیو کېنولو په موسم کې لسګونه زره میوه لرونکې او غیر میوه لرونکې ونې کېنوي او د دې زیرمې له لارې به یې خړوبې کړي.

کابل ښاروالي پلان لري، څو د قرغې بند سیمه په یوه لویه تفریحي او زرغونه سیمه بدله کړي، په همدې موخه به په راتلونکې کې څو څاګانې نورې هم وکیندل شي.

باختر خبري اژانس