د ژوند په باب مي ګمانونه ډير دي/ صابر جان

صابر جان محصل

د ژوند په باب مې ګمانونه ډير دي
پټه قیصه ده امیدونه ډير دي

ما د تیارو له وطن کډه کړې
د رڼا غیږ کې مې کورونه ډير دي

له بد رنګیو سره وران یم مدام
د ښکلا یون کې خو اجرونه ډير دي

د داسې مینې بندیوان یمه زه
هم يې ښکلا هم يې زخمونه ډير دي

ستا په علاج کې یم ناتوانه طبیب
ملهم مې کم دی پرهرونه ډیر دي

د ورکې مینې د لقا په لټون
صابر هم کړي سفرونه ډير دي