ادبي لیکني

د خپلواکۍ د ورځې د پنځه نوېیمې کالیزې پر پلمه

لیکوال: دادمحمد ناوک

له خپل ستر رهبر علیحضرت غازي محمد جان خان رحمه الله سره د یوه ډیموکرات او اوسني ځون خواله:

سلام غازي سلام!
زه له هماغې خاورې دغه کرښې درته لیکم، چې غازي ادې دې په لښکرو کې ترکابله درسره لاړه او ستاسو په خبره دشهادت جام يې نوش کړ.
زه نه په ځان کې د غازې ادې غیرت وینم او نه هم ستا د آس په څېر د تقدس لایق یم.

زه له تا کلونه وروسته بدل شوم، متمدین، نړیوال شوم او ستا ټولو ارزښتونو ته مې لغته ورکړه.

پام دې و، په سرکې مې درته سلام سلام ووایه، السلام علیکم ته مې له وسه نه کېدل، موږ اوس مصروف خلک یو، د مېلمنو خدمت کو، او ستا منډې ترړې هسې د هېواد او ستا پر تاوان بولو.

ته خبر يې!
موږ اوس له نړۍ سره یو، نړۍ له موږسره ده، موږ سخت پرې ګران یو، آن له امریکا چې ستا سې په وخت کې به خدایزده څومره زوروره او ستاسې دوسته وه، خو موږ ته له کیلو مترو لرې راغلې موږ ساتي، موږ هم پرې توکل کړی، موږ پرې باور کړی، د دوی ډیموکراسي مو د خپل مسایلو دحل یواځینۍ لار بللې د دوی…

اوهو غازي حوصله، حوصله، ته خو داسې سور شین واوښتې، پوهېږم ته به وايې چې ستا جنګونو او ستړیو ته مو نه دي کتلي؛ کتلي مو دي ښه په زور زیر مو ورته ته کتلي او اوس هڅه کوو چې د خپلو بهرنیانو دوستانو پر مټ يې د تاریخ له مخه هم پاک کړو، ځکه چې تاسې جنګ کړی، تاسې ترهګر واست، تاسې وینې توی کړې، تاسې د عدم تشدد پر ستوني چاړه تېره کړې تاسې…

ګوره حوصله! مادرته وویل چې موږ اوس بدل یو، هغه تاسې چې جهاد باله او پر مټ مو يې انګریزان له خاورې وشړل، ته خبر يې اوس يې موږ په خبرونو کې څه بولو، «ترهګري»؛ ځکه چې اوس موږ ټول روشنفکران، مدني فعالان او خبریالان ښکاره وایوچې که غازي محمد جانخان او امثالهم هغه جنایت « د انګریزانو شړل» نه وای کړي، موږ به اوس سل کاله وړاندې په ډېموکراسي کې وو، موږ به اوس د اورګاډي پټلۍ تړله، زموږ مېرمنو به اوس چادري نه په سر کولي، موږ به اوس هلکان او نجونې په ټولګي او کارځایونو کې لاس په لاس ګرځېدلو، اوف… خو دا تاسې واست چې په انګریزانو پسې مو ټوپکې را واخیستې او خپله خوندوره ګټه «ډیموکراسي» مو په لغته ووهله.

ځه! خو بیا هم ستاسې ارمان پوره نه شو، دا دی له تاسې نږدې سل کاله وروسته موږ تر انګریزانو لا زړور او په ډیموکراسي کې اتلان مېلمانه کورته راوستل، اوس موږ په ډيموکراسي باور لرو، موږ يې د هرې ستونزې د حل لپاره کاروو، موږ د همدې قانون له مخې ښځې بازارونو ته راباسو، هغه نه وه هغه تاسې چې به پکې غونډې کولې د کابل په خیرخانه کې، څو ورځې وړاندې یو ځوان چې ستاسې له پست او وروسته پاتې فکره متاثره شوی وو، څو نور زاړه او له تمدنه لرې خلک يې پرځان راټول کړي و، بیا يې په اوسني معاصره رسنۍ «نیټ» کې راپور خپور کړی و، چې موږ پر همدې خیرخان کې پنځه ویشت فاحشه خانې وتړلې.

خندا مې ورته راغله دوی لا تر اوسه هم شما رکوي «پنځه ویشت»، موږ اوس عصري یو، موږ تر امریکایانو نو څه کم یو؟

موږ اوس هغه لویه زولنه چې تاسې مهمه فریضه بلله «امر بالمعروف او نهی عن المنکر» له بېخه ونړوله، اوس زموږ ډیموکراسي زموږ لپاره فردي ازادي را کړې ده، چې هرڅوک هرڅه کوي، هیڅوک ورته هیڅ نه شي ویلای، کنه له ورکه ګوره سر راپورته کړه او ستا د اس د پلونو کابل ووینه!

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x