خلاف د زړه او عقل درېدل اسانه نه دي/ شرين زوی

شهزاده شیرین زوی

خلاف د زړه او عقل درېــــدل اسانــــه نه دي
پوټکی له خپل ځان ځنې اېستل اسانه نه دي

ثبوت مې د وفا هـــــر بې وفا تــه دی ورکړی
که څه هم بد پـــــه ښو ځوابول اسانه نه دي

د خپل اخلاص طعنې او پېغورونه مې زغملي
په يېبلو پښو سکروټو باندې تلل اسانه نه دي

محفل کـــې د بې دردو يم له درده خندېدلی
ژړا تـــه د خندا رنــګ ورکــــول اسانه نه دي

ما ډېر نازونه وړي دي پــــه خپلو باڼـو باندې
نښتر د چــــا و پښو تـــه ټيټول اسانه نه دي

ما تل فکر د نورو د مفاد پـه خپل زيـان کړی
زما شيرين زوی نوم نور هېرول اسانه نه دي