افغانستان

د غزني د حج او اوقافو رییس مړی وموندل شو

نن ټکی اسیا (شنبه، وږي ۱۵مه ۱۳۹۳ل): د غزني ولایت د حج او اوقافو رییس چې څو ورځې وړاندې ناڅرګندو وسله والو تښتولی و، مړی يې نن سهار د میدان وردګ ولایت په سید اباد ولسوالۍ کې وموندل شو.

د غزني ولایت د حج او اوقافو رییس حاجي فضل احمد د غزني – کابل پر لویه لاره د میدان وردګو ولایت د سید اباد ولسوالۍ په «هفت اسیاب» نومې سیمه کې د ناڅرګندو وسله والو له لورې د وږي په ۱۲مه وتښتول شو.

نوموړي سره همدا راز د ده یو ساتونکی او موټر چلونکی هم تښتول شوي چې برخلیک یې لا هم ناڅرګند دی.

د غزني ولایت د والي ویاند د حج او اوقافو رییس د وژنې تایید کړی او ویلي یې دي چې مړی يې نن سهار په سیداباد ولسوالۍ کې موندل شوی او نن يې غزني ولایت ته د سرې میاشتې په مرسته انتقال کړی دی.

بل پلو د میدان وردګ ولایت د والي ویاند وايي چې دغې سیمې ته يې د سرې میاشتې کسان ليږلي و او هغوی يې مړی تر لاسه کړی دی. نوموړی وايي چې دغه کار طالبانو کړی دی.

خو تر دې مهاله د نوموړي د وژنې مسوولیت هیچا په غاړه نه دی اخېستی.

د نوموړي د تښتونې سره سم نن ټکی اسیا د طالب ویاند ذبیح الله مجاهد سره د ایمیل له لارې اړیکه ونیوله، مجاهد يې په اړه وویل چې هيڅ معلومات نه لري خو لګیا دي پلټنې کوي.

مجاهد زیاته کړه چې دوی د نوموړي د تښتونې په اړه دوی پلټنې وکړې خو معلومه نشوه چې چا تښتولی. د مجاهد وايي چې لا هم معلومه نه ده چې حاجي فضل احمد طالبانو که نورو کسانو تښتولی.

طالب ویاند وویل چې په دې اړه به نور جزییات وروسته وړاندې کړي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x