ادبي لیکني

په افغان ادبي بهیر کې په ادبي غلا خبرې وشوې

نن ټکی اسیا (شنبه، وږي ۲۲مه، ۱۳۹۳ل): د افغان ادبي بهیر د دې اوونۍ په ناسته کې چې تېر ماسپښين د کتاب ښار په تالار کې ترسره شوه، د ناستې مشر له امریکا نه راغلی استاد سعدالدین شپون او مېلمه يې محبوب الله خان و.

په دغه ناسته کې د مناثرې د برخې ویاند نورګل شفق او مشاعرې ته حبیب زی ویاند شو.

محمد نسیم سبا د تېرې اوونۍ راپور واوراوه چې استاد شپون يې راپور ښه، خو لوستل بې خونده وګڼل. ورپسې استاد اسدالله غضنفر دريځ ته وغوښتل شو او د ادبي درس تر سرلیک لاندې يې د ادبي غلا په اړه معلومات وړاندې کړل.

استاد غضنفر وویل چې تېرو وختو ته په کتو اوس د غلا تصور بدل شوی دی، پخوانیو به ښکاره د یو شاعر بیت را واخیست او پخپله به يې په اوښتي شکل ووایه او ویل به يې چې دا دی فلاني ته مې ځواب ورکړ. پر دې سربېره په تېرو وختو کې له بلې ژبې نه تقریباً را ژباړل شوی شعر بې له یادونې هم غلا  نه بلل کېده.

استاد غضنفر وویل چې په اوس وخت کې غلا داسې پېژندلای شو، چې د یوشاعر یو بیت یا شعر له نورو سره جوت توپیر ولري، نور يې کمزوری خو هغه د غلا شکمن شعر يې قوي وي، پر دې سربېره کولای شو  چې دسبک له مخې يې هم وپېژنو.

استاد غضنفر ټینګار وکړ چې په اوس وخت کې هیڅوک هم باید غلا ته زړه ښه نه کړي، ځکه چې روابط او مطالعه پراخ شوي دي، پېژندل يې اسانه دی.

استاد شپون د غضنفر د خبر په ارتباط وویل چې په هندوستان کې د واکمن په نامه کوم کس د يو پاکستاني لیکوال بشپړ کتاب پخپل نوم خپور کړی دی.

وروسته مشاعره پیل شوه ،چې ګڼوشاعرانو پکې برخه واخیسته او په پای کې استاد شپون بیا د ناستې د خاتمې په پار دريځ ته وغوښتل شو، استاد ناسته ښه وګڼله او د بیا راتګ وعده يې وکړه.

ناسته نږدې مازیګر پای ته ورسېده.

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x