نړۍ

ګارډين: امريکا تر اوسه له خپلو جګړو او يرغلونو عبرت نه دی اخيستی

نن ټکی اسیا (جمعه، وږي ۲۸مه، ۱۳۹۳ل): له لندنه خپرېدونکې ورځپاڼې «ګارډين» په خپله پرونۍ ګڼه کې ليکلي، چې امريکا د خپلو څو لسيزو جګړو څخه هيڅ عبرت نه دی اخيستی او هغه دا چې تر اوسه هم لا د ټولو جګړو او يرغلونو موخې نه دي څرګندې شوي.

اوس چې امريکا د اسلامي دولت پر ضد د نوي بريدونو لپاره تياری کوي، د امريکا ولسمشر بارک اوباما وايي، چې د دوی موخه د اسلامي دولت کمزوري کول دي، چې بالاخره به دغه دولت له منځه وړي، مګر د امريکايي پوځي ريس ارکان جنرال مارټن ډيمپسي ويلي، چې د اسلامي دولت ځپل تر هغو ناشوني دي، تر څو چې عربي سني هېوادونه د اسلامي دولت خواخوږي ايډيالوژي له خپل ذهنه ونه باسی.

د مقالې ليکوال زياتوي، چې د امريکايي ادارې دغه موقف د خلکو ذهنونو کې دا سوال راپورته کوي، چې د امريکا متحده ايالات به کله دغه بمبارۍ پای ته رسوي؛ مګر امريکايي چارواکي د دې سوال ځواب نه لري.

د ګارډين تحليلي ليکنه کې راغلي، چې امريکا د خپلو جګړو لپاره هيڅ واضح موقف نلري او تر اوسه چې څومره جګړې پای ته رسيدلي؛ يوه يې هم امريکا نه ده ګټلې او د دغو ناکامو جګړو لپاره تر ټولو ښه مثال د ويتنام، کوريا او افغانستان جګړې دي.

د امريکا د بنګسارې جګړه ييزې پاليسۍ يو بل مثال د صدام حسين پر ضد د امريکا يرغل دی، چې لومړی يې اعلان وکړ، چې دوی د عراق اتومي وسلې له منځه وړي، وروسته يې وويل، چې د صدام حسين رژيم بايد نسکور شي او بيا يې اعلان وکړ، چې دوی عراق ته د ديموکراسۍ نوې تحفه راوړې ده.

ليکوال زياتوي، چې د امريکا ټولو جګړې د اصلي لامل پر ځای د بهرنيو عواملو په واسطه پای ته رسيږي.

د امريکا لپاره د بريا يوازنی مثال د عراق لومړۍ جګړه وه، چې هغه مهال يې د جګړې موخې او اهداف روښانه او محدود وو او هغه مهال امريکا پر عراق ځکه بريد کړی و، چې عراقي ځواکونه د کويت له خاورې وباسي.

د عراق له لومړۍ جګړې پرته له هغې مخکې او وروسته ګردې جګړې د امريکا په زيان وې او هر وخت دوی د خيالي فتحو او برياوو خبرې کوي، تر څو ځانونه قوي او د نړي جګړه ييز قهرمانان وښيي.

د ليکنې په پای کې راغلي، تر څو چې امريکا له خپلو تېروتنو درس او عبرت نه وي اخيستی تر هغه وخته به امريکا لپاره بريا او فتحې ډېرې ناشونې وي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x