ترکيې امريکا ته د اسلامي دولت پر ضد د خپلو پوځي اډو د کارولو اجازه ورکړې

نن ټکی اسیا (دوشنبه، تلې ۲۱مه، ۱۳۹۳ل): د امريکا دفاع وزارت پينټاګان څخه په تازه خپره شوې خپرپاڼه کې راغلي، چې ترکيې دوی ته اجازه ورکړې، چې د اسلامي دولت پر ضد د ترکيې له پوځي مرکزونو او هوايي ډګرونه کار واخلي.

اسوشيټيډ پريس د پينټاګان د چارواکو له قوله وايي، چې د ترکيې د پوځي اډو کارولو او د ترکيې حکومت د کره رول تفصيل اوس هم د بحث لاندې دی او په دې اړه به بشپړ معلومات وروسته خپاره شي.
امريکايي چارواکو د ترکيې د دغې پرېکړې هرکلی کړی او زياتوي، چې د ترکيې مرسته د اسلامي دولت په ځپلو کې د دوی لپاره ښه زيری دی.

ويل کيږي، چې ترکيې د امريکا په مشرۍ نړيوالو ځواکونو ته اجازه ورکړي، چې د «انجرليک» په نوم خپله پوځي اډه د اسلامي دولت پر ضد وکاروي.
تر اوسه د اسلامي دولت پر ضد پيل شوي هوايي بريدونه د عربي خليجي هېوادونو له هوايي ډګرونو پورته کيږي.

امريکا د خپلو ايف۱۶ ډوله جنګي الوتکې ډېرۍ بمبارۍ د اردن له هوايي ډګره کوي.

امريکايي عسکر بي ۵۲ ‌ډوله جنګي الوتکې هندي سمندر کې «ديګو ګارسيا» له پوځي هوايي ډګره کوي، چې د بريتانيا سنمدري برخه ده.

امريکا له دې مخکې ترکي چارواکي هڅولي وو، چې د اسلامي دولت پر ضد مهم رول ولوبوي او د انقرې او واشنګټن تر منځ په دې اړه له څو ورځو راهيسې خبرې اترې روانې دي.

ټاکل شوې ده، چې امريکايي چارواکي به د روانې اوونۍ په ترڅ کې د ترکيې پلازمېنې انقرې ته ولاړ شي او ترکي چارواکو سره به د اسلامي دولت پر ضد د پيل شويو هوايي بريدونو او پوځي عملياتو په اړه تفصيلي خبرې اترې وکړي.

د امريکا په مشرۍ له څلويښتو زياتو عربي او نړيوالو هېوادونو د اسلامي دولت پر ضد هوايي بريدونه پيل کړي چې تر اوسه يې ډېری قربانيان ولسي وګړي دي.

د اسلامي دولت پر ضد د نړيوالو هېوادونو په ګډون سعودي عربستان، متحده عربي اماراتو، عمان، اردن، بحرين او مصر مرسته کوي.

د امريکايي بريدونو په پيل کې سعودي عربستان ويلي و، چې د اسلامي دولت پر ضد د پيل شوې جګړې نيم مصرف به ورکوي، مګر وروسته يې اعلان وکړ، چې دغه جګړه کې د دوی هر څومره خرڅ راځي دوی يې ورکولو ته تيار دي.

د امريکايي بمبارۍ سربېره اسلامي دولت مخ پر وړاندې روان دی

په داسې حال کې امريکا او نړيوالو د اسلامي دولت پر ضد درانه هوايي بريدونه پيل کړي، مګر اسلامي دولت د دې ټولو بريدونو سربېره مخ پر وړاندې روان دی او تېره ورځ يې د سوريې کرد ميشتې سيمه عين العرب «کوباني» له سختو خونړيو نښتو وروسته په بشپړه توګه ونيوله.

وروستي راوپورونه وايي، چې اسلامي دولت د پلازمينې بغداد پر لور چټک حرکت کوي او د بغداد هوايي ډګر څو کيلوميټرۍ کې جنګيږي.

امريکايي کارپوهان دغه جګړه د امريکا په زيان بولي

واشنګټن ټايمز د امريکا د هوايي ځواک د متقاعد جنرال جوزف فيزي يوه ليکنه خپره کړې او د اسلامي دولت پر ضد يې د اوباما نوې پيل شوې جګړې د ۲۰۰۱م د ۱۱م سپتمبر له پېښې سره ورته بللې او زياته کړې يې ده، چې د دغې جګړې ناوړه پايلې به له نوموړې جګړې کمې نه وي.

جنرال جوزيف، چې اوسمهال د امريکا د ستراتيژيکو او نړيوالو مطالعاتو په مرکز کې کار کوي؛ د عراق او شام پر ځمکه د اسلامي دولت پر ضد د اوسنۍ جګړې په اړه ليکلي، چې د دې جګړې پايلې به هم د ويتنام د جګړې په څېر وي او دوی به هيڅکله دغه جګړه ونه ګټي.

مشهور امريکيي ليکوال او د نظامي چارو کارپوه انډريو باسويچ واشنګټن پوسټ ته په يوه مقاله کې ليکلي، چې د اسلامي دولت پر ضد د امريکا د جګړې پايلې يوازې او يوازې ناکامي ده بل څه نه؛ دا ځکه چې د ځمکنيو حقايقو له مخې به امريکا په دغه جګړه کې سخت مالي او ځاني زيانونه وګالي او د جګړې پايلې به له هغه څه ډېرې سرچپه وي، چې امريکا يې تمه لري.

انډريو باسويچ زياتوي، چې د سپينې ماڼۍ هغه مسؤولين، چې د ستراتيژيکو پرېکړو مسؤوليت يې پر غاړه دی، د جګړې د سيمې پر ځمکنيو حقايقو نه پوهيږي او دوی هيڅکله د افغانستان، ليبيا، یمن او عراق له پخوانيو جګړو او ماتو څخه عبرت نه دی اخيستی.