غور: د چارسدې ولسوالۍ درې سوه اربکيان طالبانو سره يو ځای شوي

نن ټکی اسیا (ىوشنبه، د تلې۲۸مه، ۱۳۹۳ل):  د طالبانو وياند قاري محمد يوسف احمدي رسنيو ته په لېږل شوې خبرپاڼه کې څرګنده کړې، چې د غور ولايت چارسدې ولسوالۍ مرغاب سيمه کې درې سوه اربکيان او د هغو پلويان د قومي مخورو او سپين ږيرو په واسطه د طالبانو ليکو ته ورغلي دي.

احمدي زياتوي، چې دوی تسليم شويو کسانو ته هر کلی وايي او د هر ډول مرستو ډاډ ورکوي.

د يادونې وړ ده، چې طالبانو د دولتي چارواکو او اړوندو منسوبينو لپاره د جلب و جذب او دعوت و ارشاد په نوم دوه جلا جلا کميسيونونه ټاکلي او له دې لارې هڅې کوي، چې دولتي چارواکي ورتسليم کړي.

په دې وروستيو کې د هېواد له ډېرو سيمو داسې خبرونه راځي، چې د ملي اردو عسکر، پوليس، اربکيان او نور دولتي منسوبين طالبانو ته تسليميږي.