افغانستان

بغلان: پولیسو د ۳ پولیسو په شمول ۶ غله نیولي

نن ټکی اسیا (دوشنبه، تلې ۲۸مه ۱۳۹۳ل): د بغلان ولایت امنیتي چارواکي وايي چې په  بغلان ولایت کې يې د ۳ پولیسو په شمول  ۶ غله نیولي او یو یې د پولیسو سره په نښته کې وژلی.

د بغلان ولایت د امنیه قومندانۍ د مطبوعاتو مسوول جاوید بشارت ویلي چې د غلو دغه ډله تېره شپه د پلخمري – کندوز پر لویه لاره د  بالادوري په سیمه کې د امنیتي عسکرو سره په یوې نښته کې ګیر شول.

بغلان ولایت کې په غلاوو کې د پولیسو د ښکېلتیا خبر په په داسې حال کې ورکول کیږي چې پرون د  تلې په ۲۷مه د کابل امنیه قومندان جنرال ظاهر ظاهر  خبریالانو ته د غلو یو بانډ وښودلو چې مشري یې د «جنرال» نومې د کورنیو چارو وزارت یو افسر کوله.

د جنرال ظاهر په وینا دغو کسانو د دولتي وسلو، رینجر موټر او یونیفارم څخه په استفادې د خلکو کورونه د تلاشۍ په نوم لوټل.

د جاوید بشارت په وینا په دغه نښته کې یو وسله وال غل ووژل شو او ۶ نور يې ټپیان شول.

بشارت زیاته کړله چې په دغو ۶ غلو کې د امنیه قومندانۍ ۳ پولیس هم شامل و چې د شخصي لباس او دولتي وسلې څخه په استفادې یې غلاوې کولې.

د بغلان د امنیه قومندانۍ مطبوعاتي مسوول همدا راز وویل چې ددغو ۳ پولیسو او ۳ نورو کسانو څخه یې ۴ میله کلاشنکوفونه، یو تمانچه، یو  سراچه موټر او څو مبایلونه هم نیولي.

یادې سرچینې له قوله د پولیسو په شمول د غلو دغه بانډ د تېرو ۴ میاشتو  راهیسې  د پلخمري – کندوز  او د پلخمري- مزارشریف پر لویو لارو د تیلو ټانکرونه  او عامو خلکو څخه پیسې په زور اخېستلې.

د بالادوری سیمې اوسېدونکي وايي چې د پولیسو  په شمول د غلو دغې ډلې یوه میاشت وړاندې د شپې مهال یو سراچه موټر ودرولو او په موټر کې د ناستو خلکو څخه يې د وسلې په زور پیسې او مبایلونه واخېستل.

د دوی په وینا غلو همدا راز سراچه موټر هم ترې واخېست چې وروسته یې په کندوز کې پیدا کړ.

په  غلاو کې د پولیسو او اربکیانو ګډون څه نوې خبره نه ده، بلکې تر دې وړاندې د هېواد د ګوټ ګوټ څخه رسنیو داسې راپورونه خپاره کړي چې د غلو مشري پولیس او اربکیان کوي.

شاوخوا ۲ میاشتې وړاندې  د زمري د میاشتې په وروستۍ شپه د پغمان ولسوالي ته څېرمه د قرغې په دوه لارې کې د پولیسو له یونیفورمه په ګټه د يوې کورنۍ پنځه مېرمنې له لوټ وروسته د جنسي تېري ښکار شوي.

د سیمې خلکو په دغه قضیه کې هم د کابل پولیس ښکېل بلل او ټينګار يې کاوه چې دغه ډله ټول په یاده سیمه کې فعاله پولیس وو. خو د کابل د پولیسو ویاند بیا پر دې ټينګار کاوه چې دوی یواځې دپولیسو له یونیفورم، پېژندکارتونو او وسلو نه کار اخیستی.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x