په جوزجان کې د سپرلیو ډک دوه موټر تښتول سوي

نن ټکی اسیا: پرون څو نامعلومو وسلوالو چې شمېر یې 20 تنو ته رسیدی، د جوزجان په ولایت کې د اندخوی ولسوالی (فاریاب) او شبرغان (جوزجان) پر عمومی لاری باندي د سپرلیو ډک دوه موټر چې 12 کسه په کښي سپاره وه، له ځانه سره وتښتول.

خبرونه وايي چې دغه دوه موټران چې یو یې کرولا او بل سراچه وه، لږ تر لږه 12 کسه ښځي او نارینه په کښي سپاره وه.

د جوزجان ولایت د امنیه قومندانۍ د امنیت امر سمونوال محمد ابراهیم رسینو ته ویلي چې د دوی عسکر د پيښي وروسته سیمی ته ورغلل، مګر تر اوسه یې د پيښي په اړه هیڅ مالومات نه دی تر لاسه کړي.
د پيښي په اړه تر اوسه چا څه نه دي ویلي او نه د تښتوونکو اصلي هدف مالوم سوی دي.