ارګ ، خو خبره نوره هم ورانه کړه!!

موسی فرهاد

وړمه ورځ ارګ میشتو وظیفه دارانو د یوې مبهمي رسمي بیانیې په خپرولو سره هڅه وکړه چې د میډیا په مټ د نامسلماني لومړۍ میرمني رولاغني هغه اسلام ضد خبري توجیه کړي چې څو ورځي وړاندي یې د فرانسې له خبري ادارې (فرانس پریس) سره په مرکه کې کړي وي . نوموړې پخپله مرکه کې ویلي ؤو چې د فرانسې د هغه قانون چې پر اسلامي حجاب یې بندیز لګولی ؛ بشپړ ملاتړ کوي . په حجاب کې خو ښځه ړنده غوندي ښکاري ، زه ښځو ته وایم چې تر حجاب دې تعلیم اړین وبولي ، د حجاب بندیز باید دوی اړي نکړي چې زدکړي پریږدي . عیسوۍ رولا چې لا له مخکي یې هم د ځان او خپل خاوند اشرف غني په وړاندي د افغانانو بدګماني ځان ته جلب کړي ؛ په دې اسلام ضد خبرو یې نور هم د ملت عقاید مجروح کړل او په دې توګه یې د افغانانانو ردعمل ته لاره هواره کړه. په ټولنیزو شبکو کې پراخ انعکاس یې یوه نمونه ده . د افغانانو تاریخ دی چې د خپلو ایماني معتقداتو په وړاندي ګستاخي هیڅکله نشي زغملی . د آمان الله خان او بیا وروسته د ابتدائي کمونیستانو کړني یې نژدې بیلګي دي .

د دغه شان نازک حالت او سختي ویري په درک کولو سره ارګ میشتو وګړو بیانیه خپره کړه ترڅو د لومړۍ میرمني پر ناسمو خبرو باندي پرده واچوي او په دې توګه د مسلمان ملت د راپاریدلو مخنیوی وکړي . زه فکر کوم چې دغي بیانیې پرځای د دې چې خبره تصحیح کړي ؛ نوره یې هم ورانه کړه . دا ځکه چې د رولاغنی خبري کول حقیقت دی . او له یو ډېر مهم آژانس سره یې کړي دي چې ټوله دنیا یې کتلی ، لیدلی ، ویلای او په ټولو ژبو یې اړولی شي . په دې کې هیڅ شک نشته . آژانس هم پر دې خبرو اعتراف لري چې وایی په ژباړه کې یې هیڅ ډول لاسوهنه نه ده سوي . او نه تراوسه نامسلماني رولا د خپلوخبرو تردید کړی دی . بل داچې تراوسه پوري پر انټرنیټ پاڼو د دې مرکي متن په هره ژبه پروت دی . هم اصلي مرکه چې په فرانسوي شوي ، او هم یې په نورو ژبو کې ژباړي موجودي دي .

دې ټولو خبرو ته په کتو سره د ارګ په رسمي بیان کې چې ډیري ناڅرګندي جملي یې کارولي ؛ د دې ټکي هیڅ وضاحت نه دی شوی چې که واقعاً رولا بی بی ګلي دا ډول خبري کړي نه وي ؛ نو څه یې ویلي دي ، هغه ټکي خو یې باید را اخیستی وای چي خلکو ته څرګند او په حقیقت خبر شي . خو دوی ورته هیڅ اشاره نه ده کړي ، یوازي دومره ویل شوي چې د میرمني خبري ناسمي تعبیر سوي دي . له فرانسوي نه يې په انګریزي کې د ژباړي پرمهال لاسوهنه او تیروتنه شوي ده . ګویا د فرانسي معتبر آژانس د دې خبري په بل ډول اړولي دي .

په هر صورت اوس خبره دا ده چې د ارګ د توضیحیي اعلامیې له خپریدلو نه څرګندیږي چې ارګ یعنی د کابل ادارې هم د موضوع حساسیت ښه درک کړی . چې دا ډول خبري د قرآنکریم له صریح حکم سره په ټکر کې دي . دا څه وړه فرعي او اختلافي مسئله نه ده چې د ارګ لومړۍ میرمني په دومره جرأت سره پیل ورباندي وکړ او افغانانو او نړۍ ته یې دا وښوده چې د ښځو د حقوقو تر عنوان لاندي ، د اسلام د دین په وړاندي مبارزه د لومړۍ میرمني لومړنۍ دنده ده . نو که چیري د ارګ تبصره رښتیا وي ؛ نو بیا دې هغه واقعیت واضح کړي او یا دې میرمنه پخپله دا خبره تردید کړي . او که رښتیا نه وي صرف د هغي پر خطرناکو خبرو باندي پرده اچول وي . بلکه خبره هغسی وي لکه څنګه چې یې کړي ده ، نو بیا په دې صورت کې د کابل اداره دې ته څه موقف نیسی ، آیا هغه به تائیدوي ، ځکه چې دا خو هم د څه عام وګړي خبري نه دي بلکي د یو هیواد د لومړۍ میرمني چې له رئیس جمهور نه وروسته دویم رسمي مقام لري ؛ خبري دي او دا د دې شخصي خبري نه ګڼلي کیږي بلکي د یو هیواد رسمي موقف او عقیده څرګنده وي . د ارګ بیانیې دا هم ثابته کړه چې د هغې خبري د حکومت خبري دي چې وضاحت ، تردید او تائید یې هم ارګ د ځان خپله وظیفه ګڼي . نو په داسي یو حالت کې بیا مانا دا شوه چې د افغانستان حکومت رسماً داسي یو قانون تائید کړ چې څرګند کفر دی او د قرآن له حکم سره سل په سل کې په تصادم کې دی .

زه ګمان کوم چې د ارګ دې وروستۍ سیاسي میډیايی هڅي نه یوازي داچې د نا مسلماني رولا میرمني خبري یې سمي نکړي ، بلکي نوره یې هم خبره ورانه کړه او د کابل رژیم یې په یو لوی ازمویښت کې واچاوه. چې اوس به نو د کابل بی واکه چارواکي د مسلمان افغان ملت په وړاندي ، پرخپلو وروستیو اسلام ضد شعوري کړنو باندي پرده اچوي او که به نور هم دغي لړۍ ته علني دوام ورکوي !؟