افغانستان

افغانستان د ستراتيژيکو همکاريو سند امريکا ته وسپارلو

نن ټکی آسیا: تیره ورځ د جمهوري رياست څخه په خپره شوې خبر پاڼه کې وويل شول چې نن د جمهور رئيس حامد “کرزي” په مشرۍ د جمهوري رياست د مرستيالانو او يو شمير نورو امنيتي مسئولينو په ګډون د ملي امنيت د شورى غونډه جوړه شوه چې پکې په مختلفو مسئلو خبرې وشوې.

خبر پاڼه وايي غونډه کې وويل شول  چې د امريکا او افغانستان تر منځ د ستراتيژيکو همکاريو سند د افغانستان لخوا ترتيب شوې چې امريکايي مقاماتو ته سپارل شوى دى او ډير ژر به د دې سند ضميمې هم امريکايي لورې ته وسپارل شي .

خبر پاڼه زياتوي د ملي امنيت شورى هغه کميسيون ته چې د دې سند د ترتيبولو لپاره تشکيل شوى دنده وسپارل شوه  چې د دې سند پر ضميمو باندې هم کار وکړي او  د ملي امنيت د شورى د تاييد نه وروسته يې امريکايي لوري ته وسپاري .

په همدې غونډه کې د امنيت د انتقال د کميسيون مشر ډاکټر اشرف غني “احمدزي” هم خبرې وکړې او ويې ويل په هغو اوه ولايتونو او سيمو کې چې مخکې اعلان شوى وى د امنيت د انتقال لپاره چمتوالى په کلکه سره دوام لري  او پدې اړه د ناټو د قواوو سره هم همغږي رامنځته  شوې ده.

هغه ډاډ ورکړ د هغو ترتيباتو او چمتوالي له امله چې د افغانستان له لورې نيول شوي د امنيت انتقال به په ټاکلي وخت کې پيل او تر سره شي .

دې غونډه کې د سردار محمد داؤد خان په روغتون د بريد په اړه هم خبرې وشوې او امنيتي مسئولينو يې په اړه يو لړ توضيحات ورکړل او پدې بريد کې يې د لاس درلودلو په تور د يو شمير کسانو د نيولو خبر ورکړ.

امنيتي مسئولينو وويل چې پدې برخه کې يو لړ  پرمختګونه شوي او تحقيقات دوام لري .

همدا راز غونډه کې د کنړ او نورستان په وضعه هم خبرې شوې او ډاډ ورکول شو چې پدې دواړو ولايتونو کې امنيتي وضعه تر کنترول لاندې ده .

د دې غونډې په يوه بله برخه کې په افغانستان کې د ناټو د قواوو عمومي قوماندان د امريکا سفير او د ناټو ملکي استازي هم برخه واخيسته او د هغه تدبيرونو او چمتوالي په اړه يې چې د امنيت د کلکوالي لپاره نيول شوي معلومات ورکړل.

پايد وويل شي جمهور رئيس حامد “کرزي” ژمنه کړې چې د افغانستان او امريکا تر منځ د سولې د ستراتيژيکو همکاريو د سند په اړه به لويه جرګه جوړه او په دې اړه به د هغوى نظر د وروستۍ پريکړې حيثيت ولري خو دا معلومه نده چې دغه لويه جرګه به کله او د دې سند په کومه مرحله کې جوړه شي .

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x