نن ټکی اسیا مو سل زره وارې مننه کوي!

د نن ټکي اسیا خبري-تحلیلي او ټولنیزه وېب پاڼې د فېسبوک صفحې خوښوونکي نن له سلو زرو واوښتل. د نن ټکي اسیا ټول خبریالان او لیکوال ستاسو له هرې خوښونې سل زره وارې مننه کوي، ستاسو مینې، داد او ډاډ دي چې موږ دا ستونزمن او کړاوجن یون پیل کړ او له څلور کلن سفر وروسته په هېواد کې دننه د ډېرو کتونکو پرلیکه رسنیو په کتار کې ودرېدو. په دومره لنډ وخت کې دومره پرمختګ ستاسو له همکاریو او دعاوو پرته ناشوني و. نن چې دا مننلیک لیکو د ټولو هغو نالیدلو همکارانو هغه لیکونه مو سترګو سترګو ته کېږي چې په ډېر اخلاص او مینې يې د همکارۍ او لاسنیوي سینه راته ډبولې ده. زموږ هغه خبریالان چې د هېواد په ځینو لویو ښارونو کې د راپور جوړولو پر مهال د پولیسو له خوا ځورول شوي، خو دوی خپل کار نه دی درولی او په ډېر اخلاص سره یې خپل کار ترسره کړی هم د ډېر قدرداني وړ دي.

نن ټکی اسیا خبري-تحلیلي او ټولنیزه وېب پاڼه له نن څخه پوره څلور کاله وړاندې د ۲۰۱۰م کال پر ډسمبر د څو تنو روڼ اندو او وطنپالو خبریالانو له لورې پر لیکه شوه. موږ ستاسو ټولو په څېر پرلیکه افغاني رسنیو کې د یوې داسې رسنۍ کمی احساس کړ چې د ملي او اسلامي ارزښتونو د پراختیا او خورېدا له پاره خپرونې ولري او ولس ته د پېښو رښتینی انځور وړاندې کړي. بې له شکه چې هغه مهال موږ د دغسې یوې هدفمنې او رسالت لرونکې رسنۍ نشت احساس کړ؛ ځکه مو د بې ځایه انتظار پر ځای پر خپلو همفکرو ملګرو غږ وکړ چې خپلې وړتیاوې زموږ په واک کې راکړي څو د دغسې یوې پراخې رسنۍ د بنسټ ډبره کېږدو. له دې فرصت نه په استفادې له ټولو هغو ملګرو مننه کوو او د هڅو او شوګیرو قدردانی یې کوو چې د هغو د بې وقفې کار پایله شوه چې نن ټکي اسیا دا سخت سفر تر دې ځایه په بریالیتوب سره راورساوه.

زموږ له هغو همکارانو ځانګړې مننه په کار ده چې له کور کلي لرې د مساپرۍ شپې تېروي، څوک په زده کړو بوخت دي او څوک یوې مړۍ ډوډۍ پسې لالهانده دي؛ خو له نن ټکي اسیا سره یې منظمه همکاري خپله ملي او اسلامي وجیبه او فریضه ګڼلې ده.

د نن ټکي اسیا د بریا راز

له دې پوښتنې سره بار بار مخامخ کېږو چې څنګه نن ټکي اسیا وتوانېده چې په ډېر لنډ وخت کې له داسې رسنیو مخکې شي چې هم پراخ مالي ملاتړ لري او هم له نورو اسانتیاوو برخمن دي.

لکه پورته مو چې له خپلو همکارانو مننه وکړه، خدای دې دوی موږ ته لري، لرې نه ده چې افغانستان په لنډ وخت کې د معیاري رسنیو څښتن کړي.

د نن ټکي اسیا د بریا عمده راز پاک ملي او اسلامي هدف دی. د نن ټکي اسیا همکاران د ځان مطرح کولو او یا نورو امتیازاتو له پاره کار نه کوي. دوی یوازې خپلو ارزښتونو ته په پام سره شپه او ورځ خپل وخت د وېب پاڼې غنا ته ورکوي.

موږ دا بریا له تاسو ټولو سره په ګډه نمانځو!

د نن ټکي اسیا نشراتي تګلاره

نن ټکی اسیا د خبر په برخه کې د خبر ثقه توب ته ارزښت ورکوي. موږ هڅه کوو چې تر کومه مو وس رسېږي د پېښو داسې انځور خپلو لوستونکو ته وړاندې کړو چې کله کله د ځینو رسنیو له خوا یې په اړه لارورک کوونکي تبلیغات کېږي. موږ غواړو ولس ته مو حقایق څنګه چې دي، هغسې ورسوو.

د خبر د برخې ترڅنګ موږ د سیاسي، ادبی، ټولنیزو مسایلو، دیني،  ټکنالوژۍ، روغتیا او ورزش په برخو کې په منظم ډول مطالب خپروو. په دغو برخو کې موږ سربېره پر دې چې د لیکوالۍ پر فن د لیکوال برلاسی په پام کې نیسو، ورسره ورسره ملي او اسلامي ارزښتونه زموږ سرې کرښې تشکیلوي.

هر هغه مطلب چې د لیکوالۍ له معیار سره برابر وي او زموږ ملي او اسلامي ارزښتونه په کې نه وي نقض شوي د نشر وړ دی. موږ د افکارو پر تنوع باور لر؛ خو تر هغه سرحده چې دغه دوه عالي ارزښتونه په کې زیانمن نه شي.

موږ ته مو په پورته شرایطو برابرې لیکنې راولېږئ چې موږ یې ولس ته ورسوو. نن ټکی اسیا ستاسو او د ولس ترمنځ ارتباطي پُل کړئ!

موږ سالم رقابت غواړو

موږ یوازنۍ رسنۍ نه یو چې ولس ته د پېښو رښتینی انځور وړاندې کوو. په دې لار کې د نورو هدفمنو او رسالت لرونکو رسنیو کار ته په درنه ګورو او هغوی د ځان ګڼو. د هغوی پرمختګ خپل ګڼو او د امکان تر حده مو یې لاسنیو کړی.

نن ټکی اسیا د افکارو پر تنوع باور لري او احترام یې کوي؛ خو له دې سره سره پر سالم رقابت لا ټینګ باور لري.

که څه هم نن د ګیلو ځای نه دی؛ خو له دې په لاس راغلي فرصت څخه یوه واقعیت ته اشاره کوو. ځینو رسنیو او خاصو سیاسي جهتونو کوښښ کړی چې د نن ټکی اسیا په باب منفي تبلیغات وکړي، په یوه او بل نامه یې نورو پورې وتړي؛ خو له دې کوششونو سره سره نن موږ و تاسو د یوې نسبتا ښې لاسته راوړنې شاهدان یو. موږ چا سره ټکر نه کوو او نه ټکر له خپلو لوړو ارزښتونو سره همغږی ګڼو؛ دغو اړخونو ته یوازې دومره وايو چې راځئ د سالم رقابت لار خپله کړئ، تورونه او تومتونه مو هېڅ ځای ته نه رسوي. که تاسې هم د منفي تورونو پر ځای د سالم رقابت لار خپله کړئ، لرې نه ده چې د ولس په زړه کې ځای پیدا کړئ او درباندې اعتماد وشي.

ډېرې رسنۍ او ځینې ورځپاڼې له نن ټکي اسیا څخه خبرونه اخلي بې له دې چې د سرچینې یوه یادونه وکړي. دا لږ تر لږه د نن ټکي اسیا یو فرهنګي حق دی چې باید مننه یې وکړئ؛ خو موږ د مننې پر ځای د معیار پلوي یو. یوازې که مرجع یاده کړئ، په دې کار سره به له یوې خوا کار معیاري شي او له بلې خوا به د علمي سرقت فرهنګ مخنیوی کړی وي. موږ د مشخصو رسنیو نوم یادونه مناسبه نه بولو.

سالم رقابت نه یوازې د رسنیو په ډګر کې، بلکې په هره برخه کې د هېواد د هراړخیز پرمختګ او ودې شرط دی.

په پای کې مو یو ځل بیا د خوښوونو مننه کوو او په دې شریک لوړ هدف کې مو د لاسنیوي او همکارۍ هیله من یو.

ښاد او اباد اوسئ

نن ټکی اسیا خبري-تحلیلي وېب پاڼه
nunn.asia@gmail.com