د ساندو قافلې

مولوي عرفان الله عرفاني
د خيال پر کلي مې را درومي قافلې په ساندو
په ترنم ترنم وايي کليمې په ساندو

د زړګي کور ته مې راغلی د غمونو کاروان
څيرې ګرېوان کې مې شوې اوښکې مېلمنې په ساندو

د خوشحاليو کډې لاړې د سحرا په لوري
نن دي راغلي پر موږ باندې ورځې شپې په ساندو

د وينو رنګ دي بيا سرې کړي کنارې د اسمان
پر اوږو اخلو د ځوانانو جنازې په ساندو

خواره مورکۍ مو همېشه شهيد بچی يادوي
ورځي په چيغو او ژړا تر مقبرې په ساندو

ناست يم د هجر په حجره کې ياره ستاله غمه
بېلتون را اچوي په پښو کې زولنې په ساندو

داسې څوک نشته ورته ووايم د زړه حالونه
تيريږي موږ باندې وختونه زمانې په ساندو

هره مصره يې د غزل په چيغو چيغو ژاړي
عرفاني ليکي د آهونو ترانې په ساندو

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د