د اُردُني پیلوټ ژوندي سوځول نړیوالو ته څه پیغام لري؟

عبدالرحيم ثاقب
سیاسي څېړونکی او شناند

د چارشنبې په ورځ ټولې نړیوالې رسنۍ د داعش لخوا د اعدام کړای شوي اُردُني پیلوټ معاذ الکساسبه  د اعدامولو او ژوندي سوځولو پر پیښې مصروفې ولې.

دغه زړه بوږنونکې پیښه لکه څومره، چې دردونکې په هماغه اندازه درس ورکوونکې او له عبرتونو هم ډکه  ده، کاشکي  د نړۍ مسلمان او غیر مسلمان سیاسیون ترې پر خپل وخت عبرت واخلي.

معاذ الکساسبه په خپله هم مسلمان، د مسلمان هیواد وګړي او د یوې دینداره کورنۍ غړی و،  نوموړي همدا سږکال د حج مبارکه فریضه هم پر ځای کړې، او د هغه د نیږدې ملګرو او خپلوانو د وینا له مخې معاذ په کلي، ښوونځي او له خلګو سره په تعامل کې تر ټولو متدین او د ښو اخلاقو لرونکی ځوان و.

خو د دې ټولو ښیګڼو تر څنګ بیا همدې مسلمان پیلوټ د امریکا په دستور د هغوی د کفري ایتلاف له جنګي الوتکو سره یو ځای په عراق او سوریه کې پر هغو کلیو او سیمو بمباري کوله، چې د داعش د جنګیالو د شتون شک ورباندې کیدو.  سوریه او عراق دواړه د اُردُن په ګاونډ کې اسلامي هیوادونه دي، چې د هغوی مسلمان ولسونه په خپل منځ  کې پر عقیدوي او دیني یووالي سربېره  نور هم  ډېر فرهنګي او نژادي مشترکات لري.

خو  د پوښتنې ځای دا دی، چې دغه مسلمان پیلوټ ولي او د چا د مصالحو لپاره د خپل اسلامي ګاونډ پر مسلمانو خلګو او د هغوی پر معصومو ماشومانو سوځوونکي بمونه اورول؟

د پوښتنې ځواب ښکاره دی، چې نوموړی پیلوټ د خپل دین او عقیدې د ټولو احكامو او غوښتنو پر خلاف یواځې د صلیبي امریکایانو د رضايت لپاره د خپلو مسلمانو وروڼو پر خلاف د هغوی سیمې بمبارولې او هلته يي د امریکايي پوځ افسرانو په قومانده ډېر بېګناه  تنکي ماشومان او بېوزله  انسانان  د ځان په  وینو ولمبول.

دا چې امریکایان دغه بمبار یواځې د داعش د له منځه وړلو او ورکولو لپاره بولي، هغه په هیڅ صورت د توجیه وړ نه دی؛ ځکه همدغو امریکایانو زمونږ په هیواد افغانستان کې هم په دغه ډول بمبارونو کې په زرګونو بېوزله ولسي کسان  وژلي او ځورولي، چې  بیا يي پر هغوی هم د وسله والو مخالفینو نوم ایښی دی.

په هرصورت! اُردُنی مسلمان پیلوټ  د امریکایانو په دستور د مسلمانانو په خلاف وکارول شو، په عراق او سوریه کې یې ډېر مسلمانان د صلیبیانو د خوشالولو لپاره په سوځنده بمونو وسوځول. ترڅو بالاخره دی هم د هغو مظلومانو د مظلومیت ښکار او یوه ورځ یې همداسي په ژوندوني په سرو لمبو کې د وریتیتدلو دردناک عذاب ولیدو، د آخرت جزا يي د الله تعالی په علم پورې تړلې،

چې هلته به څه ورسره کیږي؟

اوس د نوموړي د سوځونې په اړه دوې خبرې د بحث وړ دي :

لومړی دا چې ایا دغه سوځونه د هغه د عمل شرعي جزاء او که د اسلامي احکامو مخالفت دی؟

دوهمه دا چې داعش ولي د دغه ډول غیر انساني او غیر اسلامي عمل په تر سره کولو لاس پورې کړ؟

د اسلامي امت جمهور علماء د حضرت محمد صلی الله علیه وسلم د هغه مبارک صحیح حدیث له مخې، چې امام بخاري روایت کړی او ویلي دي، چې د ژوندي انسان حتی د هر ژوند لرونکي مخلوق سوځول ناروا بولي .

 په دې اړه حضرت امام بخاري رحمه الله په صحیح البخاري کې یو مکمل باب د (لاَ يُعَذَّبُ بِعَذَابِ اللَّهِ) تر عنوان لاندې ترتيب او په لاندې متن سره راوړی دی :

  2853ـ عَنْ أَبِي هُرَيْرَةَ رَضِيَ اللَّهُ عَنْهُ، أَنَّهُ قَالَ: بَعَثَنَا رَسُولُ اللَّهِ صَلَّى اللهُ عَلَيْهِ وَسَلَّمَ فِي بَعْثٍ فَقَالَ: «إِنْ وَجَدْتُمْ فُلاَنًا وَفُلاَنًا فَأَحْرِقُوهُمَا بِالنَّارِ»، ثُمَّ قَالَ رَسُولُ اللَّهِ صَلَّى اللهُ عَلَيْهِ وَسَلَّمَ حِينَ أردنا الخُرُوجَ:

{ إنِّي أَمَرْتُكُمْ أَنْ تُحْرِقُوا فُلاَنًا وَفُلاَنًا، وَإِنَّ النَّارَ لاَ يُعَذِّبُ بِهَا إِلَّا اللَّهُ، فَإِنْ وَجَدْتُمُوهُمَا فَاقْتُلُوهُمَا}

ژباړه : له حضرت ابوهریره رضی الله عنه څخه روایت دی، چې هغه وايي :  مونږ رسول الله صلی الله علیه وسلم د یوې غزا لپاره  لیږلو او دا يي راته وویل، چې که فلانی او فلانی په لاس درغلل؛ نو هغوی په اور وسوځوئ!

بیا چې کله مونږ د هماغې غزا په لوري روانېدلو؛ نو داسې ارشاد یې راته وکړ : ما تاسو ته امر وکړ،  چې فلانی او فلانی وسوځوئ، خو په اور باندې یواځې الله تعالی (خپل مخلوق ته) عذاب ورکوي، نو که تاسو هغه كسان پیداکړل (سوځوئ یې مه) بلکې ویې  وژنئ!

 البته ځیني علماء لکه امام ابن تمیمه رحمه الله په استثنايي حالاتو کې د قصاص اخیستلو په صورت کې د بالمثل معاملې په تر سره کولو قائل دی، خو د هغوی قول د امام بخاري په روايت د صحیح حدیث او د جمهورو علماوو د قول په مقابل کې ارجحیت نه لري. چې پر دې اساس ویلای شو، چې د داعش لخوا د اُردُني پیلوټ ژوندي سوځول د اسلامي شریعت  خلاف عمل دی ، په هیڅ صورت د تائید وړ نه دی او نه هم  دا کار د اسلام د مبارک دین له سپیڅلیو احکامو سره اړخ لګوي؛ خو دا چې داعش ولي پر دغه ډول نا روا عمل لاس پورې کړ، هغه خپل مبررات لري،  مبرارات او لاملونه یې دا دي، چې هغه مهال چې داعش لا موجود نه و، امریکایانو د افغانستان او عراق د اشغال په مهال په زرګونو بېوزله انسانان ، ښځې او ماشومان دا ډول د کیمايي وسلو او اور لرونکو بمونو په وسیله وسوځول، پر هغه سربېره یې د ګوانتنامو، ابو غریب او بګرام په زندانونو کې له بې دفاع بندیانو سره داسې چلند وکړ، چې هم د قانون خلاف و، هم د  اسماني ادیانو او هم د ټول انسانیت . خو دا چې امریکایان د نړۍ بې سیاله واکداران ول؛ نو هغوی خپل ځان هم تر قانون لوړ باله، هم تر دین او هم تر ټولو انساني مقرراتو او په نړۍ کې د بشري حقونو د دفاع په نوم سازمانونو مقررات او قوانین  یواځې پر هغه چا پلي کېدل او پلي کېږي، چې  هغوی کمزوري وي.

هماغه ده چې د امریکایانو دغه ډول خپلسري او ناقانونیت په نړۍ کې د نورو ناقانونیتونو او خپلسریو لپاره زمینه مساعده کړه او نن خبره دې ته ورسیده، چې د بشري قوانینو د مخالفت تر څنګ د شرعي مقرراتو هم مخالفت کیږي او ژوندي انسانان  په اور سوځول کیږي.

د دې خپلسري او لاقانونیت اساس خپلسرو امریکایانو ایښی، چې نن د هغه له اغیزو څخه خپله دوی هم متأثر دي .

د داعش لخوا د اُردُني پيلوټ سوځونه د انسان سوځونې لومړۍ پیښه نه ده ، بلکې تر دې له مخه په افغانستان ، عراق، فلسطین، منځنۍ آسیا او مصر کې په زرګونو بېوزله ژوندي انسانان د امریکایانو او د هغوی د حامیانو لخوا سوځول شوي ، هېچا د هغوی د مظلومیت په اړه هم غږ نه دی پورته کړی او نه یې دغسي مطبوعاتي هنګامه ترې جوړه کړې، لکه نن چې یې د اُردُني پیلوټ د سوځولو په  اړه جوړه کړې .

د دې هنګامې هم لامل معلوم دی او هغه دا چې اُردُنی پیلوټ د امریکايي ایتلاف یو غړی و او امریکایان یواځې هغه کار تروریستي پېښه او د قانون خلاف بولي، چې د دوی د مصالحو خلاف وي .
په دې اړه مشهور امریکايي لیکوال نوم چاومیسکي (Noam Chomsky )وايي چې که مونږ (امريكايان) د مسلمانانو پر خلاف هر څه تر سره کوو، هغه قانون او مقررات بلل کیږي ، خو که دوی د خپل ځان په دفاع کې زمونږ پر خلاف غبرګون ښکاره کوي، هغه بیا د امريكايي چارواکو له نظره ترهګري او تروریزم وي .

په هرصورت :  د امریکا د سرزوري او حماقت په نتیجه کې د منځته راغلي لاقانونیت له وجې د داعش په لاس د اُردُني پیلوټ سوځونه په حقیقت کې د امریکايي وحشت په مقابل کې یو ناسم غبرګون دی او ښايي په راتلونکي کې د بشري حقونو پر خلاف تر دې هم زیاتې زړه بوږنوونکي پیښې رامنځته شي، لهذا د نړۍ باحکمته سیاسیونو ته که هغه مسلمان دي او که د نورو ادیانو پلویان دي دا په کار دی، چې د منطق ، حکمت او استدلال په مټ هغه ‌‌ذهني ناروغان (ليونيان)  مهار کړي، چې دا ډول کړنې تر سره کوي، کنه لیري نه ده، چې د دغه ډل لیونیانو د لیونتوب او شرارت له وجې ټول بشریت  ناآرامه او برخلیک یې د دا ډول کسانو د ناموجهو کړنو العوبه وګرځي.