نوی نړیوال ریکاډ؛ یو انځور په ۳۰۰ میلیونه ډالر وپلورل شو

نن ټکی اسیا (یکشنبه، سلواغې ۱۹مه ۱۳۹۳ل): دغه رسم چې «کله واده کوې؟» په نامه سره یادیږي او د فرانسې یو انځورګر لخوا چې «ګوګا» نومیږي په ۱۸۹۲ زیږیدیز کال کې رسم کړی و. دغه انځور تر دې مهاله د سویس هیواد یو نادرو انځورونو ساتونکی سره و.

د ځینې نا تایید شوي راپورونو پر بنسټ دغه انځور د قطر یو موزیم اخېستی دی.

له دې وړاندې هم د قطر هیواد د یو انځور لاسته راوړلو لپاره د تاریخ تر ټولو زیاتې پیسې ورکړې وې په ۲۹ ملیونه او ۹ لکو ډالرو په بدل کې یي د یو بل فرانسوي انځورګر «سیزان» لخوا رسم شوی انځور پیریدلی و.

د ګوګا دغه انځور له دې لیلام وړاندې د سویتزرلینډ هیواد بیزل ښار اوسېدونکی روډولف سټیشلن نومې کس ملکیت و.

له څو لسیزو دغه تصویر د بیزل ښار په یو موزیم کې ځړول شوی و خو د امریکايي رسنیو په وینا د روډولف او دغه موزیم تر منځ د نظر اختلاف د دې لامل شو چې روډولف د دغه انځور د خرڅولو پریکړه وکړي.

روډولف سټیشلن نیویارک ټایمز ته په مرکه کې ویلي چې نوموړی نه غواړي نړیوالو ته د پیریدونکي د هویت په اړه معلومات وړاندې کړي.

تر دې مهاله دا هم ندی معلوم چې دغه لیلام په کومه سیمه کې ترسره شوی خو د ځینې راپورونو پر بنسټ دغه انځور د قطر هیواد په یو اوسیدونکی خرڅ شوی. د قطر دولت تر دې مهاله د دغې راپورونو په اړه څه نه دي ویلي.

ځینې پخواني معلومات په ډاګه کوي چې د قطر شاهي کورنۍ په وروستیو کې زیاته اندازه پیسې د اروپايي رسامانو د انځورونو پیریدلو لپاره لګولی.

قطر هیواد د ثقافت پخوانی وزیر شیخ سعود بن محمد الثانی چې تیر کال وفات شو له دولتي خزانې څخه یو میلیارد ډالر له اروپا څخه تاریخي انځورونو پیریدلو لپاره لګولي وو.