………او روسان چا واېستل؟

شاعر: عبدالمالک بېکسیبار

روسان نيم تلې څپلۍ ،
روسان شلېدلي ګريوان ،
روسان په خړ خيرن واسكټ دپاسه،
دسرې، زړې خمتا درې كونجه پيوند،
روسان د كلي دماشوم لېندۍ
زموږ ه له كلا واېستل،
او ماليده چې روسان چا واېستل ،
روسان نهرو ويالو ،
روسان ګونګي مازديګر ،
روسان نالوستي ګودر ،
روسان په پورې غونډۍ خښ
شهيد غاټول واېستل ،
روسان له دوړو ډك پكول واېستل ،
ټولې نړۍ ورته كاته چې روسان ډلې ډلې ،
او وارخطا وارخطا،
له څرخي پله نه راوچتې شور غوغا واېستل ،
او ماليده چې روسان چا واېستل ؟!!
روسان د ميندو ښېرو ،
روسان دخويندو ساندو،
روسان پښې يبلې يتيم ،
روسان له ژونده ناخبره سرګردان كوچي ،
روسان ددې خاورې په وينو تاريخ ،
روسان ددې خلكو بې كچې سپېڅلتيا واېستل ،
او ماليده چې روسان چا واېستل ؟!!
روسان واخان كې د وزلوبې د اسونو دربا،
روسان ګومل كې زنګ وهلي پنځه ډزي ټوپك ،
روسان زموږ دتشو مېنو وهم ،
روسان زموږ ه د وچتو غرو بې ژبو تيارو ،
روسان ددې وطن زېږي غوندې هوا واېستل ،
او ماليده چې روسان چا واېستل ؟!
روسان چې و يې اېستل ،
تابه وې بس ده چې اېستل ،
تورې جامې ،
ټيك لكه بخت د وطن ،
په اوږو كړى د زړې خمتا موښلى څادر،
پايڅو يې داسې تورې وازې ، وازې خولې نيولې ،
لكه روسان به تورېدل چې له زاړه ټوپك يې ،
سترګې به خدايږو هيڅ پرې نه مړېدې ،
ماوې چې څوارلس به لا نه وي پوره ،
چاوې قدم چې سپوږمۍ واخلي
نوپنځلس به شي ،
نې (۱) ځان روڼاندى باله ،
او نه ملا اېسېده ،
دوطن د مور ريښتينى بچى ،
د آزادۍ مجاهد ،
چې يې دا سره ديوان له پولې د دنيا واېستل ،
او ماليده چې روسان چا واېستل ،

avatar
1 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
نبیل افغان
میلمه
نبیل افغان

ډیر نامي شعر ده الله دي اباد لره بېکسیبار صاب
دا شعر مي یووخت په مشاعره کي لوستي وو خو شاعر ئې نه وو رامالوم
دخلګو ډیر خوښ سو .