نړۍ

کوهاټ: په چاڼيزو عملياتو کې له سلو زيات افغانان نيول شوي

نن ټکی اسیا (سه شنبه، سلواغې ۲۸مه ۱۳۹۳ل): د پېښور پر پوځي ښوونځي له خونړي بريد دوه مياشتې وروسته هم خيبرپښتونخوا کې د شکمنو کسانو پر ضد عمليات روان دي.

د کوهاټ پوليسو مشر رسنيو سره په خپلو خبرو کې وويل، چې نن سه شنبه سهار وختي يې د کوهاټ په ګڼو سيمو کې د ځايي خلکو او افغانانو پر ضد چاڼيز عمليات پيل کړي او تر اوسه يې له ۲۵۲ زيات کسان نيولي، چې له سلو زيات يې افغانان دي.
د پوليسو مشر وايي، چې عمليات د افغانانو په ګمګول او ګلشن اباد کمپونو او ګڼو نورو سيمو کې پيل شوي دي.

دغه پوليس وايي، چې نيول شوي افغانان پاکستان کې د اوسيدو لپاره قانوني اسناد نه لري او د دوی پر ضد يې د ناقانونه اوسيدونکو قضيه درج کړې ده.

خيبر پښتونخوا کې دا عمليات وروسته له هغې پيل شوي، چې د تېر کال ډيسمبر مياشت په شپاړسمه نېټه د پيښور پر پوځي ښوونځي خونړی بريد وشو.

له ياد بريد وروسته امنيتي چارواکو د خيبر پښتونخوا په ګډون ټول پاکستان او ازاد کشمير کې د شکمنو کسانو پر ضد د عملياتو په ترڅ کې سلګونو افغانان نيولي دي.

د امنيتي ځواکونو د ځورولو له امله زرګونه کورنۍ له پاکستانه په دې ساړه ژمي کې خپل هېواد ته راستانه شوي دي.

که څه هم د پاکستان کورنيو چارو وزير چودهري نثار علي خان او مهاجرينو وزير متقاعد جنرال عبدالقادر بلوڅ په خپلو څرګندونو کې ويلي، چې دې پېښه کې د افغانانو هيڅ لاس نه شته، مګر امنيتي ځواکونه هر ځای افغانان ځوروي، بنديانوي يې او د خلاصېدو لپاره ترې زرګونو روپۍ غواړي.

کډوالو لپاره د ملګرو ملتونو اداره «UNHCR» وايي، چې د پېښور له خونړي بريد وروسته د امنيتي ځواکونو د کړولو او ځورولو له امله ۲۲زره راجستر افغانانو پاکستان پرېښئ او په دې ساړه ژمي خپل هېواد ته راستانه شوي دي.

افغانستان لپاره د «UNHCR» مشر ريچارډ ډانزيګر وايي، چې پاکستان د هر ناوړه عمل مسوولیت په افغان مهاجرینو اچوي: «هر کله چې یو ډاروونکی کار وشي، مسوولیت يې پر بهرنیانو اچول کیږي».

که څه هم پاکستان لپاره د افغان سفير جانان موسی زي تېره اونۍ اسلام اباد کې د انصاف غورځنګ له مشر عمران خان څخه وغوښتل، چې د دوی عسکر دې افغانان نه تنګوي، مګر د ګډ حکومت مشرانو تر اوسه پاکستان کې د افغانانو د ځورولو په اړه رسما څه نه دي ويلي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x