بلخ کې يوې ښځې له خپل مېړه سر غوڅ کړی

نن ټکی اسیا (پنجشنبه، کب ۷مه، ۱۳۹۳ل): د هېواد په شمال ولایت بلخ کې يوه ښځې له خپل مېړه سر غوڅ کړی دی.
د بلخ ولايت امنيتي چارواکي وايي، چې وړمه ورځ د مزارشريف علي شېر نوايي سيمه کې يوې ښځې له خپل مېړه سر غوڅ کړی او دوی په دې جرم دغه ښځه او د وژل شوي سړي ورور نيولي دي.

پوليس وايي، چې مجرم پر پوليسو هم ډزې کړي او ادعا يې کړې، چې پر کور يې غله وراوښتي وو او د ده ورور يې هم وژلی دی.

د چارواکو په وينا د پېښې په اړه يې پلټنې پيل کړي او د لومړنيو معلوماتو له مخې د وژل شوي سړي نيول شوي له خپلې وريندراې سره نا مشروع اړيکې درلودې او دواړو په ګډه دغه سړی وژلی دی، مګر نيول شوې ښځې د پېښې څېړونکي کميسيون ته ويلي، چې مېړه يې پرې له ډېر وخته ظلمونه کول.

کورنۍ ستونزې که څه هم طبعي او د ژوند برخه ده، خو دا چې خبره د کورنۍ د غړي ښځې يا مېړه تر وژلو ورسيږي، يو شمېر کورني او بهرني عوامل لري.

د افغانستان په تاريخ کې تېر ديارلس کاله د کورني شخړو تر ټولو خونړي کلونه بلل کيږي.

ګڼ شمېر افغانان فکر کوي، چې د دغو ستونزو تر شا د ښځې او مېړه د بې پرواهي په ګډون د بهرنيو ډرامو، فلمونو او د بهرنيو انجیوګانو له لوري د خلکو په کورنيو چارو کې مداخلې او لاسوهنې دي.

د کابل د فاميلي محکمې يو قاضي محمد عالم سادات وايي، چې د بهرنيو مؤسسو له لوري د افغانانو په کورنيو چارو کې د مداخلو او لاسوهنې له امله د زرګونه کورنيو تر منځ شخړې راپيدا شوي او د ښځې او مېړه د طلاق زرګونه قضيې په محاکمو کې درج شوي دي.

د « kabul love story» په نوم فلمي راپور کې راغلي، چې يوازې پلازمېنه کابل کې سلګونه ښځې د کورني تاوتريخوالي له امله په زندانونو کې پرتې دي او د جرمونو لامل يې مېړه وژل، له کوره تښتېدل د دفتري کار له امله مېړه، خسرګنۍ، او پلارګنۍ سره شخړې او لانجې ښودل شوي دي.